La populaziun n’è anc betg turnada

L’interess da las medias è stà grond ier glindesdi avantmezdi a Brinzauls. RTR, RSI, SRF, Südostschweiz, SDA ed era la FMR – tuts han vulì savair, co ch’i vesa or en il vitg e sche la glieud è gia turnada. Danor la zona serrada direct sut il culm vala dapi ier numnadamain puspè la fasa verda a Brinzauls. E quai munta via libra per tuttas e tuts. Sper las collavuraturas ed ils collavuraturs da las medias han ins dentant entupà be pauca glieud en il vitg ch’è stà evacuà durant 62 emnas. Gist sco la gronda part da la populaziun n’è damai era la normalitad anc betg turnada.

In um tschertgà a Brinzauls

«Che tuts turnan gist oz a Brinzauls, quai n’hai jau betg spetgà», ha Daniel Albertin ditg envers la FMR e cunquai confermà l’impressiun ch’igl è anc adina in vitg per gronda part bandunà. Tenor il president da la vischnanca Albula/Alvra hajan las bleras abitantas ed abitants stabilì ordaifer lur mintgadi: «Els han abitaziuns en novs lieus, ils uffants ston ir a scola, la glieud sto lavurar. Damai èsi cler ch’ins na fa betg immediat la midada.»

Cunquai che la vita turna be plaun plaunet, è Daniel Albertin stà tant pli fitg en il focus e franc l’um il pli tschertgà da las medias a Brinzauls. Actualmain na chaschuna l’attenziun mediala dentant naginas notgs senza sien al president communal: «Che la glieud po turnar a Brinzauls, è tuttavia stà in grond levgiament per nus, cunzunt cunquai ch’igl è franc era per la populaziun sezza in grond levgiament. Nus avain propi spetgà quest mument.» Per pudair terminar l’evacuaziun hajan ins però era fatg las examinaziuns necessarias durant las ultimas emnas.

La lavur va vinavant

Sco che Daniel Albertin ha explitgà vinavant, na saja la lavur dentant anc betg fatga cun la fin da l’evacuaziun: «Uschespert ch’il levgiament è passà in pau, vai puspè per las dumondas da l’avegnir.» Actualmain lavuran las autoritads numnadamain vi da las translocaziuns preventivas. E schegea che la nova situaziun al culm po eventualmain persvader l’ina u l’autra persuna dapli da turnar e restar a Brinzauls, vegn il vitg franc a perder inqual abitant ed abitanta. En connex cun las translocaziuns preventivas munta quai dentant era che las chasas bandunadas ston vegnir spazzadas. E quai avess consequenzas per il maletg dal lieu.

Per quellas e quels che n’han anc betg prendì ina decisiun, mo era per las autoritads datti pia anc adina bleras dumondas avertas. La vischnanca vul vinavant pussibilitar tant la translocaziun sco er il return en in vitg intact e vivibel. Per quai dovri dentant era vita e normalitad a Brinzauls. Anc ussa n’è quai – forsa era gist pervia da l’attenziun mediala – anc betg il cas. «Igl è», sco ch’il president communal ha ditg, «schon in pau curius l’emprim mument dad ir tras il vitg». E sco persuna d’ordaifer n’èsi strusch pussibel da betg guardar si vers il «rutsch» ch’è sa fermà be paucs meters sur Brinzauls.