«Nus nun eschan orientats finanzialmaing»
Il directur general da la rait mundiala dad Education in Motion (EiM), Marc Ledermann, d’eira eir preschaint a la radunanza generala da l’Institut Otalpin Ftan (HIF).
PL: Marc Ledermann, sco CEO dad EiM visita El pella prüma jada il HIF. Che per üna scoula ha El chattà quia?
Marc Ledermann: Eu n’ha chattà üna grondiusa scoula cun ün team paschiunà chi metta il focus süllas scolars ed ils scolars. Eu n’ha eir gnü la pussibiltà da dumandar als giuvenils co cha lur experienza da scoula es al HIF e sun fich impreschiunà da l’impreschiun ch’els survegnan. Impustüt pels scolars dal program Ignite es il sogiuorn a Ftan ün’experienza chi müda la vita.
Il HIF scriva amo adüna cifras cotschnas. Che disch El davart quai?
Üna gronda priorità esa cha’l HIF dvainta finanzialmaing stabil. Nus eschan però persvas cha nus ragiundschain quai bainbod. Pel program internaziunal farana adattaziuns. Las püttas gimnasi e Sports Academy restan sco fin uossa, ma nus vulain guadagnar amo daplü scolaras e scolars internaziunals per cha nus ragiundschan la grondezza critica.
Actualmaing visitan 90 scolaras e scolars il HIF, inclus ils partecipants dal program Ignite. Che significha concretamaing «la grondezza critica»?
Nus nun eschan dalöntsch davent. Eu spet cha nus scrivan i’ls prossems duos ons cifras finanzialas positivas. Quai füss nos böt. Nus nun eschan però üna gruppa chi’d es orientada finanzialmaing, ma chi metta las scolaras ed ils scolars i’l center. Quia nu faina neir ingüns cumpromiss a quai chi pertocca la qualità o l’experienza dals uffants e dals giuvenils.
Gust da leger dapli?