On da scoula cun decisiuns pel futur

La 111avla radunanza generala da l’Institut Otalpin Ftan ha gnü lö in sonda davomezdi sainza spectaculs. Sper ils success da scolaras e scolars sco eir dad atletas ed atlets ha la scoula però danövmaing stuvü preschantar cifras cotschnas.

L’on 2025/25 d’eiran 79 scolaras e scolars a l’Institut Otalpin Ftan (HIF), dals quals han 50 scolaras e scolars visità il gimnasi e 29 han tut part al program Ignite Switzerland. «Cha nus eschan sun üna buna via han muossà ils resultats da l’on da scoula passà cleramaing», ha dit il president dal cussagl administrativ Jon Peer in occasiun da la 111avla radunanza generala in sonda davomezdi. Tuot las ses maturandas e maturands han reuschi la matura. La media da la classa d’eira 5,54 ed il meglder resultat la nota remarchabla d’ün 5,96.

Il program Ignite Switzerland maina a giuvenils da la rait mundiala dad Education in Motion (EiM) a Ftan. Quai adüna dürant dudesch eivnas. Il HIF es üna part da la famiglia da scoula globala. Tenor il directur dal HIF, Jared Nolan, sun ils resuns dals genituors da giuvenils chi han partecipà davo il sogiuorn a Ftan «per 100 % positivs». Ils cuosts per ün scolar sun però ots. Per guadagnar daplü scolaras e scolars, dess il program uossa gnir schlargià. Uschea dessan in avegnir eir esser pussibels sogiuorns plü cuorts da tschinch fin ses eivnas.

Schlargiar il profil internaziunal

Tenor Jon Peer d’eira il 2024/25 «ün on da scoula cun decisiuns pel futur». Per schlargiar il profil internaziunal s’haja promovü l’introducziun da l’International Advanced Diploma (IAD). La sporta da scolaziun internaziunala as drizza a giuvenils chi han in mera üna carriera da stüdi internaziunala. L’IAD cumplettescha la matura svizra e cumbina «A-Levels» cun lavurs da proget, qualificaziuns cumplementaras sco eir accents principals in leadership, persistenza e pensar sistematic. Il program ha cumanzà quist on cun ot scolars.

Ils cuosts nu sun cuvernats

Neir passa desch ons davo cha la scoula vaiva bod stuvü serrar dal 2015 nu po il HIF preschantar cifras nairas. «I’ls ons passats vaina creà fundamaints importants per l’avegnir, ma adonta da svilups nu lavuraina amo adüna na uschea chi cuverna ils cuosts», ha infuormà Jon Peer. Ils motivs principals: cuosts fixs ots ed il svilup da nouvs programs per l’internaziunalisaziun. Tenor Christoph Küng, manader Business Administration, as poja contemplar il 2024/25 sco «on transitori», impustüt perquai cha l’International Baccalaureate (IB) nun es plü gnü sport e’l program IAD nun appartgnaiva amo a la sporta.

Christoph Küng ha infuormà detagliadamaing davart il quint annual 2024/25. «Il svilup dal nomer da scolaras e scolars ha gnü consequenzas directas pel schmerdsch», ha’l declerà. L’annullaziun dal program IB insembel cun nomers plü bass dal program Ignite (da 39 l’on avant sün 29) han manà ad üna regressiun dal schmertsch per 8 %. Al listess mumaint esa gnü investi i’l nouv program IAD. Il resultat dal manaschi ha bain pudü gnir megldrà, es però darcheu negativ. La sanaziun dal bilantsch e la situaziun directa da liquidaziun sun inavant stabilas grazcha a deposits in reservas da deposits da chapital ed ils impraists d’acziunaris. Il resultat operativ (EBITDA) importa minus 1,6 milliuns francs, il s-chavd annual s-chars 2,5 milliuns francs.

«Natüralmaing nun es EiM cuntainta cha nus fain üna perdita minch’on e nus varan eir quist on ün s-chavd, ma plü pac co l’on passà», ha dit cusglier administrativ e Vice Chairman EiM Group, Christian Gürtler. El ha agiunt: «Nus eschan bod sgürs cha nus scrivaran – grazcha a tuot las masüras cha nus piglian uossa – i’l 2026/27 cifras nairas.»

Nouvas persunas chi mainan

Frappant a la radunanza generala d’eira chi s’ha comunichà cha diversas posiziuns da clav sun gnüdas occupadas cun nouvas persunas: Uossa maina Larissa Kessler il gimnasi, manader da l’internat es davo la pensiun da Joe Zangerl Padraig Hogan chi’d es eir respunsabel pel program Ignite. Alma Buchli es la nouva manadra Admissions, Marketing & Community Experience. «Posiziuns da clav vegnan planisadas pro nus a temp, las surdattas succedan professiunalmaing per cha’l manaschi resta stabil», ha intunà Jon Peer, il president dal cussagl administrativ.