Pascal Stoll ei niev meinafatschenta

Il cussegl d’administraziun da Sedrun Mustér Turissem (SMT) ha eligiu Pascal Stoll sco niev meinafatschenta e successur da Nicole Weber. El surpren la direcziun operativa dall’organisaziun da turissem l’entschatta matg 2026. Nicole Weber banduna il menaschi la fin d’avrel 2026.

«Fascinaus dil turissem»

Pascal Stoll (47) che ha priu dimora a Mustér avon cuort temps ei maridaus e bab da dus affons. «El ei fascinaus dalla branscha turistica seigi ord vesta professiunala sco persunala», scriva SMT en ina communicaziun als mieds da massa. El ei engaschaus dapi 20 onns ell’aviatica, il mument sco captain tier easyJet Schweiz. «El ha il senn da responsabladad, ei flexibels e ferms da menar. Quei ein las premissas per in bien menaschi tier SMT», scriva l’organisaziun da turissem. Sin fundament da siu engaschament ell’aviatica enconuschi el las circumstanzias internaziunalas e co esser autentics e cordials ella hospitalitad. El seigi la persuna ideala al tgamun operativ da SMT.

Svilup dalla regiun

Sco Sedrun Mustér Turissem scriva, vegn Pascal Stoll ad esser ina persuna da clav el svilup dalla strategia alla regiun Andermatt Sedrun Mustér: «El vegn a s’engaschar egl augment dallas aventuras dalla clientella enten sviluppar ed introducir novs survetschs da prestaziun e purschidas sco per exempel events.» Ils davos onns ha SMT luvrau vid ina nova strategia ensemen culs purtaders turistics e las vischnauncas da Mustér, Tujetsch ed Andermatt. «Quella stretga collaboraziun ei decisiva pil success dalla purschida turistica dall’entira regiun d’Andermatt, Tujetsch e Mustér», constatescha SMT.