Carlo Janka prelegia ella biblioteca

Venderdis, ils 30 da schaner 2026, allas 19.30, prelegia Carlo Janka (39) ella Biblioteca populara Mustér e contuorn el plaunterren dalla casa da scola a Cons. Igl anteriur skiunz d’elita da Sursaissa prelegia ord siu cudisch che porta il tetel «Durchbruch – Mein Weg – Dein Erfolg!» e relata da siu temps sco sportist da professiun. Ils onns 2009 e 2010 ha Carlo Janka festivau ils pli gronds success. Al campiunadi mundial a Val-d’Isère igl onn 2009 ha el gudignau la medaglia d’aur el slalom gigant ed in onn pli tard eis el daventaus campiun olimpic en quella disciplina a Vancouver. Medemamein a Val-d’Isère eis el staus tierz ella cuorsa rapida. La stagiun 2009/10 ha Carlo Janka gudignau il classament total dalla cuppa mundiala ed ei staus secund el classament total dalla cuorsa rapida. El ha gudignau treis cuorsas rapidas, in super-G, quater slaloms gigants e treis concurrenzas dalla cumbinaziun ella cuppa mundiala. Ils 21 da december 2005 eis el partius l’emprema ga ella cuppa mundiala, ils 15 da schaner 2022 ha el terminau sia carriera. Entrada libra, collecta.