«Ei va mo sch’ins lavura culla natira»

«Ozilgi san ins contribuir bia cun baghegiar las pistas aschia ch’ei dat dameins accidents», di Corsin Clopath (42), il menader dil sectur pistas salvament dallas pendicularas Arena Alva SA. «Nus investin bia ella segirtad da nossa clientella sin pista e vegnin perquei da minimar quels accidents ch’ins savess attribuir alla qualitad dallas pistas.» Onns sco uonn cun pauca neiv seigi ei buca sempel da stuppar mintga ruosna, di il menader.

La segirtad munta tut

Las pistas hagien da far bia culla segirtad e cul salvament el territori da skis sur Laax, Flem e Falera. Alla fin dils quens porti el sco schef la responsabladad. «Ins empren fetg bia cun l’experientscha da plirs onns e cun scolaziuns regularas. Cura ch’ei setracta per exempel d’arver singulas pistas sai jeu giudicar oz fetg spert sch’ina pista ei segira ni buca.» Las decisiuns arisguard l’avertura dallas pistas dil territori da skis Arena Alva vegnien denton adina discutadas e dadas dad in gremi, di Corsin Clopath ch’ei carschius si a Trin e che ha empriu da selvicultur sco emprem mistregn.

In bellezia sentiment

La motivaziun da Corsin Clopath da luvrar sco menader da salvament e da pistas tier las pendicularas Arena Alva SA ei principalmein la lavur giuado ella natira. «Igl ei in bellezia sentiment d’esser siado els cuolms dad uras ch’ins entaupa negin leu. Ei ha dau temps che la lavur en nies team ei stada difficila. Jeu sun perfin staus sil precint da bandunar l’Arena Alva inagada. Mo il davos sun jeu restaus grazia a miu superiur Reto Gurtner e grazia a mia affecziun per la natira e las muntognas.»

«Ei s’auda tier la veta dil carstgaun»

Sper tut ils biars muments legreivels ha ei era dau situaziuns tragicas ella lavur d’entochen dacheu dil schef da salvament e da pistas dall’Arena Alva. «Ei ha dau entgins accidents mortals sin nossas pistas. Quei ein adina situaziuns extraordinarias.» Specialmein bein seregordi el vid igl emprem grev accident mortal, raquenta Corsin Clopath. «Jeu seregordel ch’jeu haiel mirau cunscientamein en fatscha a quella persuna morta. Quei maletg ei propi ius afuns a mi ed ei restaus gitg.» El hagi saviu da bial’entschatta ch’el stoppi cattar ina strategia per vegnir a frida cun grevs accidents e mortoris sin pista. Oz seigi quei daventau pli fetg rutina. «Oz ei quei daventau per mei pli normal d’ir entuorn cun in accident mortal ed jeu patratgel lu adina che la mort s’auda era tier la veta dil carstgaun.» Il pli impurtont seigi ei da saver ch’ins hagi fatg il pusseivel en favur dalla persuna disgraziada.

Muments ch’ins funcziunescha

Sper ils accidents da hosps hagi ei era dau avon paucs onns in accident mortal d’in collaboratur dall’Arena Alva, raquenta Corsin Clopath. «Jeu haiel fatg atras auters accidents da collaboraturs e collegas. Mo en quei cass dil december 2022 haiel jeu registrau ualti spert ch’ins saveva buca gidar pli il collega ch’ei sedisgraziaus sil mast dalla pendiculara da Crap Sogn Gion.» Ei seigi grev da declarar ils agens sentiments, mo en tals muments funcziuneschi ins semplamein. Ils maletgs e la reflexiun schebein ins hagi fatg tut endretg seigien –  el cass digl emprendist sedisgraziau – turnai la sera suenter igl accident cura ch’el eri a casa. «Igl ei tragic, mo en certas situaziuns d’accidents datti cunfins ed ins sa far nuot pli per la persuna disgraziada. En lezza situaziun eisi impurtont da tgirar ils cunparticipai sil plaz d’accident.»

Ina gronda famiglia

Corsin Clopath ei era menader da tgauns da lavinas ed el vegn savens accumpignaus da siu tgaun Yard. El raquenta ch’el lavuri dapi igl onn 2002 tier las pendicularas Arena Alva. Cun la responsabladad per pistas salvament seigi el stedi sil cuolm, tgiri biars contacts e discuors era cun collaboraturas e collaboraturs. «Jeu haiel l’impressiun che nus seigien sc’ina gronda famiglia che viva la filosofia e che lavura tenor las ideas innovativas che Reto Gurtner realisescha ensemen cun nus.» Els sesprovien da dar il maximum era en favur dallas vischnauncas da Flem Laax e Falera ch’ein ussa las possessuras dallas pendicularas. «Cun quellas vischnauncas cultivein nus dapi biars onns buns contacts. Ellas eran gia pli baul las possessuras dils indrezs da far neiv.»

Sittar lavinas

Ina dallas lavurs preferidas da Corsin Clopath ei quella da sittar lavinas ord il helicopter. «Ei funcziunescha buca adina sin camond», di el. La natira detti cunfins ed  ei seigi buca pusseivel da sfurzar enzatgei.«Da quels muments ch’ins vegn buca da sittar ina lavina ves’ins propi il cunfins dallas pusseivladads ch’il carstgaun ha. Ei va mo sch’ins lavura culla natira. E che la veglia dalla natira ei pli ferma che quella dil carstgaun.» Quei seigi enzatgei che impressiuneschi el adina puspei, cumpletescha Corsin Clopath ch’ei dapi igl atun 2024 commember dalla direcziun dalla Arena Alva SA.

La natira camonda

«Tscheu e leu ha biara glieud breigias da capir, daco ch’ins sa buca schar ir ina pendiculara pervia dil vent memia ferm ni perquei che nus essan vidlunder da far lavurs da segirtad», di Corsin Clopath. Il medem vali era per pistas ch’ins sa buca arver. «Els territoris da skis eis ei semplamein de facto che la natira camonda las fiastas e buca il carstgaun. Il carstgaun sa far il pusseivel, mo sch’ins vesa ch’igl ei prigulus, lu ha il carstgaun d’acceptar e da secuntener leusuenter.» Sch’el astgassi exprimer in giavisch en sia funcziun sco menader dil survetsch da salvament e da pistas, lu giavischassi el che la glieud hagi dapli capientscha pils cunfins che la natira detti als territoris da sport d’unviern.