Pli baud era tut meglier – cunzunt ils dinosaurs

La stad 2025 è il settavel film or da la retscha Jurassic Park / Jurassic World cumparì en ils kinos. Bun in mez onn pli tard poss jau constatar: Na, bellas acturas ed acturs e dinosaurs pli e pli nauschs na tanschan betg per crear in film divertent.

Jau en mintga cas hai vesì avunda dals adina medems caracters stravagads. Ils ranvers èn pli e pli ranvers, ils scienziads pli e pli sturns ed ils rambos pli e pli iperbrutals ed ipersensibels. Il medem vala deplorablamain era per ils dinosaurs sezs. En il pli nov film cumpara sco punct culminant da la creaziun intellectuala da scenaristas e scenarists l’uschenumnà D-Rex. Quai è in tirannosaur malgartegià cun ina chavazzuna, quatter chommas e dus bratschins. Absurd!

A tgi che desiderescha in pau divertiment trivial cun dinosaurs, cussegl jau damai da laschar dal maun ils novs films giurassics e da guardar be l’emprim. Gea, il Jurassic Park vegliander da l’onn 1993. En quel fruntan ins numnadamain anc sin protagonists e protagonistas cun caracter e spiert, sin dinsoraus «realistics» e sin scenas iconicas – sco l’aua vibranta, cura ch’il tirannosaur s’avischina per l’emprima giada als protagonists. Igl è quai ina scena che fa snavurs senza il brimbori dals films pli novs.

En quest cas constat pia la moda da dir: Pli baud era tut meglier!