Promts per ina tiarza perioda d’uffeci

Il venderdis vargau ei il termin dallas demissiuns en vesta allas elecziuns communalas da questa primavera a Tujetsch spiraus. Dalla suprastonza communala ha Pius Cavegn da Sedrun abdicau. Medemamein han Reto Schmid da Sedrun e Maurin Cavegn da Camischolas inoltrau lur demissiuns sco commembers dalla cumissiun da gestiun. Dalla cumissiun da baghegiar remetta Franz Decurtins da Bugnei siu uffeci. Entochen ils 9 da mars 2026 san candidaturas per la suprastonza communala, la cumissiun da gestiun ed il cussegl da scola vegnir inoltradas all’administraziun communala. Igl emprem scrutini dallas elecziuns communalas pil trienni 2026–2029 ei fixaus sin dumengia, ils 3 da matg 2026, in eventual secund scrutini ha liug dumengia, ils 14 da zercladur 2026. La nova perioda d’uffeci entscheiva igl emprem da fenadur 2026.

Da remplazzar in gerau

Dalla suprastonza communala en uffeci recandideschan il president communal Martin Cavegn da Sedrun sco era la geraua Nicole Giossi da Rueras ed ils geraus Daniel Schmid e Guido Monn, omisdus da Sedrun. Dalla cumissiun da gestiun recandidescha sulet Silvio Schmid da Sedrun. En quei gremi ein duas representantas ni representants da remplazzar. Pil cussegl da scola stattan Ronny Levy e Tanja Loretz, omisdus da Sedrun, vinavon a disposiziun.

Garantir la cuntinuitad

Martin Cavegn avisescha la tiarza perioda d’uffeci sco president communal da Tujetsch. Silla damonda dalla FMR, tgei che motiveschi el da restar al tgamun dalla vischnaunca di el: «Jeu sun dil meini che la cuntinuitad seigi impurtonta. Nus essan amiez la revisiun dalla planisaziun locala ed en in’impurtonta fasa pertuccont il project dil resort a Dieni. Davart quel vegn ei a dar in’informaziun publica il mars ni avrel.» In ulteriur grond project che Martin Cavegn menziunescha ei la collaboraziun turistica dalla regiun d’Andermatt-Tujetsch-Mustér. Enteifer quella presidiescha el la giunta strategica.

Scaffir spazi da habitar

In’ulteriura gronda sfida per la vischnaunca da Tujetsch ei la munconza da spazi da habitar, respectivamein da scaffir tal. «Jeu patratgel vid habitaziuns pils indigens, mo lu era per las persunas che vegnan tier nus per luvrar», di Martin Cavegn. Schegie ch’el vul buca tradir co ei va vinavon cul resort a Dieni, lai el tonaton sentir ch’ei savess dar moviment concret en quei project. Cumbinaus cul project dil resort ei denter auter il bus local, mo lu era l’engrondaziun dalla serenera. Ils davos treis onns ei la suprastonza communala stada engaschada intensivamein ella revisiun dalla planisaziun locala, la sanaziun da vias e quella dil Bogn Sedrun sco era la collaboraziun turistica ella regiun. «In grond pass ei era la digitalisaziun dall’administraziun communala staus», puntuescha Martin Cavegn.