Üna cumedgia in trais acts

A quist’occupaziun as metta la gruppa, chi exista daspö il 1993 adüna darcho gugent. Impustüt causa cha l’exerciter düraunt numerusas sairas es suvenz collio cun bgeras risadas in cumpagnia. Eir quist an deriva il text in rumauntsch puter our da la penna dad Anna Caprez. La gruppa chi consista da 10 acturas ed actuors laics as cumpuona da glieud da S-chanf e contuorns, per granda part teatrists e teatristas paschiunedas daspö ans e decennis.

Nouva da la partida illa gruppa da teater Ratatuglia S-chanf es la giuvna Cheyenne Mammoliti, chi ho mno vent fras-ch illa gruppa. Ils duos actuors da l’Engiadina Bassa, Peider Müller da Susch ed Armon Bezzola da Zernez, s’haun integros i’ls ultims trais ans fich bain illa gruppa. Els duos discuorran düraunt il töch in lur idiom vallader – s’inclegia eir cun l’egen colorit local.

Il public dess pudair giodair, sainza stüdger da memma

La gruppa da teater Ratatuglia tscherna per granda part cumedgias scu töch da rapreschantaziun. «Nus vains eir già pruvo da rapreschanter ün crimi», uschè la redschissura Anna Caprez. «A la glieud ho il töch plaschieu, ma dalum zieva ho’la eir dit, ch’üna cumedgia simpla, simplamaing per rir, füss auncha pü bella. Daspö quella vouta restains tar la recetta da success. Important es cha nos public possa turner a chesa cul cour cuntaint e scha pussibel eir auncha ün surrir in fatscha».

Datas da rapreschantaziun illa sela polivalenta a

S-chanf:

Premiera:                    venderdi, 30 schner 2026 a las  20:00h

2. rapreschantaziun:    sanda, 31 schner 2026 a las      20:00h

3. rapreschantaziun      sanda, 7 favrer 2026 a las         20:00h

Derniera:                     dumengia, 8 favrer 2026 a las   15:00h