Di da cant communabel

Avon in onn ha la radunonza generala dil District da cant Surselva (DCS) decidiu da cuntinuar sias activitads a moda autonoma. L’alternativa fuss stada da surdar tuttas cumpetenzas all’Uniun cantunala da cant dil Grischun. Per saver s’organisar independentamein, ed era per mantener la vitalitad, eis ei stau necessari da formar ina suprastonza nova. Daniel Pally da Danis ha surpriu il presidi, Alice Bertogg, Flavia Walder e Maria Candinas fan part dil gremi niev, plinavon Albert Spescha ch’ei era parsura dall’Uniun ceciliana Surselva.

Quella suprastonza nova cuntinuescha cun motivaziun gl’engaschi a favur dils 30 chors sursilvans cun biebein 900 cantaduras e cantadurs. Quest onn da cant 2025/26 viseta la suprastonza ils chors ed informescha da sias activitads. Il DCS ha instradau denter auter in fegliet ch’el edescha periodicamein.

Dacuort ha il DCS communicau la proxima occurrenza ch’el organisescha ensemen cull’Uniun ceciliana Surselva. Sonda, ils 21 da fevrer 2026, ei in di da cant communabel. L’occurrenza ella casa da scola a Trun seigi aviarta per ina e scadina, scriva il DCS en siu invit. Il program includa ina emprova da cant en treis parts cun Clau Scherrer e Flavia Walder. Il di communabel entscheiva allas 9.00 e cuoza tochen las 15.30. Per saver preparar las notas e reservar il gentar supplichescha il DCS las interessentas ed ils interessents da s’annunziar tochen ils 13 da fevrer 2026 all’adressa da mail: dcsurselva@gmail.com. (fmr/abc)