«En emprema lingia stuein nus mirar ch’ei mondi bein cun nus»

La Casa sogn Giusep a Cumpadials – ina casa da vegls e da tgira – ei stada confundatura dalla Reit da sanadad Surselva. Sia finamira era da separticipar cun siu menaschi operativ a quei construct niev cun plirs menaschis dil provediment da tgira e medicinal dalla regiun. Rodund in onn avon la partenza dalla reit ha il cussegl dalla Fundaziun Casa sogn Giusep denton decidiu da desister da quei pass il mument. «Nus havein vuliu communicar nossa decisiun ad uras als responsabels dalla Reit da sanadad Surselva», di Lucas Tuor. El ei commember dil cussegl da fundaziun e dalla cumissiun casa.

Buc il dretg mument

Il motiv principal che la Casa sogn Giusep fa ussa tuttina buca quei pass ei la structura nova ed adattada el menaschi a Cumpadials. «Nus havevan in’organisaziun cun in team da direcziun. Quella structura havein nus midau, respectivamein adattau. Dapi rodund dus onns havein nus ina meinacasa ella persuna da Ruth Camenisch e menadras da partiziun», di Lucas Tuor. Quell’adattaziun cun structuras da cader seigi secumprovada e seigi succedida independentamein dalla damonda da separticipar alla Reit da sanadad Surselva ni buc. «Sin fundament dil svilup positiv enteifer la casa ei il cussegl da fundaziun sedecidius da desister il mument dalla participaziun dalla reit. Nus lein stabilir il menaschi sco el ei ussa. Per quei motiv essan nus dil meini ch’ei seigi memia baul da far quei pass, restein denton acziunaris da quella», declara Lucas Tuor.

Il mument ei buca daus

Silla damonda, cura ch’ina participaziun operativa alla Reit da sanadad Surselva pudessi daventar actuala tier la Casa sogn Giusep di Lucas Tuor: «Quella damonda ei aviarta. Pertuccont il mument da separticipar alla reit havein nus priu neginas decisiuns.» El constatescha ch’ei dat aunc biaras damondas aviartas tier la Reit da sanadad Surselva. Tuttina vegli la Casa sogn Giusep persequitar il project. «Nus essan pertscharts dalla necessitad da tschercar collaboraziuns e da porscher igl agid vicendeivel, pertgei tut vegn adina pli cumplicau», di Lucas Tuor. Che la casa da tgira Puntreis sisum la Surselva ei medemamein buca dalla partida ella Reit da sanadad Surselva gioga negina rolla en quei connex. «En emprema lingia stuein nus mirar ch’ei mondi bein cun nus. La Casa sogn Giusep ei occupada cumpleinamein il mument cun 29 cussadentas e cussadents. Pertuccont il persunal ademplin nus las pretensiuns», puntuescha Lucas Tuor.

Partenza igl 1. da schaner 2027

La partenza dalla Reit da sanadad Surselva igl 1. da schaner 2027 ei definitiva. Quei di il president dalla reit, Manfred Manser, sin damonda dalla FMR. «Tuttas instituziuns ch’ein stadas dalla partida entochen ussa separticipeschan definitivamein», di Manfred Manser. L’excepziun seigi la Casa sogn Giusep che hagi communicau quei dacuort. «Nus partin aunc adina dil fatg che tuttas autras instituziuns da sanadad ch’ein acziunaris vegnan a transferir lur menaschis operativs ella Reit da sanadad Surselva cugl emprem da schaner 2027», di Manfred Manser (mira era box). Cullas preparativas seigien ils responsabels el plan. Per las vischnauncas ei la participaziun al capital d’aczias dalla reit voluntaria. «Las biaras vischnauncas ein participadas vid il capital d’aczias cul motiv ch’ellas vulan vegnir informadas directamein e ch’ellas san separticipar alla radunonza generala», menziunescha Manfred Manser. La Reit da sanadad Surselva duei esser igl avegnir la societad gestiunaria dallas instituziuns participadas vid ella.