Il guardian ha piars siu venter

Ivar Kohler da Schluein ha tarmess alla FMR ina fotografia ch’el ha fatg culla drona dalla situaziun. Il canzlist communal da Schluein, Marco Tschuor, ha confirmau che las autoritads seigien informadas e che la suprastonza seigi s’entupada per secussegliar dallas mesiras ch’ein necessarias. Ina dallas paucas po esser da serrar il trutg da spassegiar che meina naven dalla plazza da golf Sagogn-Schluein directamein sil Crest da Sais. Igl ei in liug exponiu cun biala vesta sur las ognas e la grava dil Rein. Buca lunsch naven cunfinescha il territori dall’anteriura vischnaunca da Castrisch cun quels da Schluein e Sagogn. Sco quei che la fotografia muossa, ei ina gronda preit dil Crest da Sais sballunaus el Rein. In schazetg approximativ lai supponer che 200–300 m3 material ei curdaus, il cass ha denton caschunau negins donns ni da material ni da persunas. All’entrada dalla Ruinaulta, leu nua ch’il Rein entra ella cavorgia, ei il Crest da Sais gl’emprem monument marcant. Igl ei quasi in guardian dalla natira. Il material ei denton buca da dir verrucano, mobein in crest da caltschina lucca da malm sco ella cavorgia tochen a La Punt-Rehanau.