Strada 1906 – e 120 onns suenter

Il vitget da Strada ei dapi 1978 fusiunada cun Glion e dapi 2014 part dalla vischnaunca gronda Ilanz/Glion. Il num renda attent ad ina «strada», in passadi da transit impurtont.

Da Pontresina a Lillesund

Tgi che parteva da Glion viers la Cadi – ni arrivava – dalla vart dretga dil Rein, mava tras Strada. Il vitget viveva buca dil transit, pertgei il marcau da Glion era memia datier. Leu eran las fatschentas e casas d’albiert, pli tard hotels, e la scumiada da cavals, e buca a Strada. Tgi che parteva naven da Glion, sefermava buca gia puspei leu, mobein cuntinuava il viadi culla carrotscha. La carta postala ch’ei tarmessa ils 7 da settember 1906 muossa ina scena da «Strada bei Ilanz». Ina dunna cul num Olga Morpurgo ha tarmess ella naven da Pontresina – cul sujet da Strada. Tgisà sch’ella era hosp ella «Pension Müller», en quei liug da cura dall’Engiadin’Aulta? La carta postala ei adressada perina gada ed ida ella Norvegia, ad Elverum, in vitg el sidost da quella tiara. Adressada eis ella ad ina «Fräulein Dora Gauslaa». Daco gest cul sujet da Strada sper Glion?

Daferton ein 120 onns vargai e carrotschas da cavals carreschan gia daditg buca pli tras Strada. La casa dubla da stric ch’ei el center dalla fotografia han ins scarpau giu 1950 e remplazzau cun in clavau. La fontauna ch’ei oz aunc avon quel porta l’annada 1950. La fotografia da 1906 cumprova denton ch’ella existeva gia avon 120 onns. Tut il transit da e viers la Cadi carrava lu sper quella fontauna ora.