Freestyle Barber – ni la psicoanalisa da ponis
Per schar tagliar cavels, van ins a Vienna «zum Frisör». Biars da quels «Frisörs» han dau nums fetg originals a lur saluns. Enzatgi haveva scret inagada ina columna sur da quels nums. Senza vuler engular quell’idea, vuless jeu denton tuttina buca tralaschar da parter cun Vus la virtuositad linguistica dils figaros da Vienna. «Hauptsache» che Vus haveies puspei enzatgei da rir.
Cun nums sco p.ex. «Kamm 2 Cut» vegn ins carmalaus da schar far quei ch’ins vul gie aschia ni aschia cu ins va tier il coiffeur. Nun ch’ins vegli semplamein schar far ora ils nuvs els cavels cul petgen. Lu fuss ins forsa beinvegnius tiel coiffeur cun num «Friseur Well Kamm». Signur «Haarschneider» ha speronza in bien «Haarkonzept» ni ina coola «Haarcooltur». Tier «Haarmaler» ni tier «Friseur Picasso» san ins ir, sch’ins vul schar colurar ils cavels e «Kopfart» dat in touch artistic alla frisura. Forsa ch’ins tuorna a casa cun ina frisura sco ord las nozzas da Figaro.
Tier coiffeur «Yigitt» e tier «Mis Friseur» mass jeu plitost buc. Tier «Hairfair» survegn ins guess ina frisura per in prezi andant. Nicole da «Haargenau by Nicole» pren segiramein fetg exact cun drizzar ils cavels e tier «Bitteschneidensiehier» san ins mussar sez la via alla forsch. Negins giavischs nunadempli!
Miu favorit ei denton «Pony und Freud Friseur». Quei salun sesanfla zuar buc ella Sigmund-Freud-Gasse a Vienna, il num lai denton sperar sin ina buna analisa dalla derivonza dils problems culs cavels. Ni silmeins san ins sperar che las frisunzas vegnien bein a frida cun las franzlas sur il frunt. Sch’ins ha in poni san ins denton era ir tier «Gestrieglt», el salun da dunna Striegl per schar stergliar.
Jeu mondel dapi onns a schar tagliar cavels tier «GmbHaar». Havevel tertgau dad era prender cun mei miu buobet per schar tunder sia bera che fageva plaunet umbrival sur ses egls. Jeu havevel quintau da schar seser el sin mia schanuglia e forsa cantar per el canzunettas, per ch’el laschi esser da tschappar la forsch sco el fageva, cu jeu vulevel tagliar mezza ses cavels. Quei fuss stau il plan, cu miu fegl haveva treis onns. Pia cuort avon che quei virus renomau ha sfurzau nus tuts da tagliar in a l’auter ils cavels tenor ils tutorials da YouTube, damai ch’ina viseta tiel «Frisör» era scumandada. Ed ussa? Tgei far culs cavels memia liungs dad in buob cun antipatia encunter lastics da cavels? Tut mes trics han sulettamein leventau siu inschign da fugir dalla forsch. La finfinala hai jeu spitgau sin da metter a letg il buobet e cu el durmeva stagn e bein, hai jeu montau la cazzola da frunt e schnippschnapp, naven cullas nialas. L’auter di eis el levaus da buna luna ed jeu hai finalmein puspei saviu contemplar sia fatscha carina senza stuer dustar vi e neu la cavellera. Sin quella moda hai jeu fatg frisura ad el entochen ch’el ha entschiet ad ir a scola.
Inagada suenter scola hai jeu entupau ina da sias pedagogas socialas. Cun discuorer in tec, ha ella vonzei dumandau co ei stetti cul coiffeur, ei seigi forsa puspei uras. Jeu hai fatg sproposits, mess miu maun sin miu dies e declarau che tagliar cavels da stgir ad enzatgi che schaigi en in letg seigi buc exnum bien per mia crusch. Ella ha dau il tgau cun in surrir beinvulent e manegiau che biars affons cun impediment reagheschien fetg sensibel sin percepziuns sensoricas, sco eba tagliar cavels. Sche jeu lubeschi, sappi ella trenar in tec quei ir tiel coiffeur per che miu fegliet s’endisi vid la forsch e vid la procedura da tagliar cavels. Quei seigi ina part da sias incumbensas sco pedagoga sociala.
Jeu savess buc esser stada pli levgiada. Las frisuras ch’ella fa ad el ein pli simmetricas che quellas che jeu tagliavel cu el durmeva baul en costas e baul en venter, cul tgau miez curclau dil plumatsch. Dapi che nus havein ina frisunza persunala ei nies «Frisurenzimmer» puspei ina combra da durmir ed il «C’Haarisma» dalla frisura da miu fegliet fa che jeu giubileschel sco sche jeu fuss stada el salun «Haarschneiderei Froh Locke». Cun in’egliada encunter tschiel exclomel jeu «Hairgott», tgei biala veta senza mezza stuer esser in «Freestyle Barber»!
En la «Columna or dal mund» raquinta da temp en temp ina persuna da lingua rumantscha che viva a l’exteriur da ses mintgadi.
Gust da leger dapli?