Scha autos filan sur il lej

Il «International Concours of Elegance» – in versiun cuorta «The Ice» – es ün’occurrenza sül Lej da San Murezzan dschiet. E quel ho gieu lö in venderdi e sanda passeda. Pel concuors s’ho San Murezzan transfurmo in ün Mecca per collecziuneders ed amatuors d’autos e per persunas entusiastas da design e lifestyle.

L’occurrenza es üna misculanza traunter ün’exposiziun düraunt il prüm di ed elemaints da parada e cuorsa al seguond di. E lò do que premis supplementers scu «Best in Show», «Spirit of St. Moritz» ubain eir «Icons on Wheels».

L’ideja es madüreda düraunt decennis

L’ideja oriunda per quist’occurrenza es naschida già i’ls ans 80. Ad üna festa sül Cresta Run l’an 1985 d’eiran nempe divers giasts da l’Ingialterra gnieus in Engiadina cun lur vegls Bentleys. Que ho inspiro a l’amatur dad autos Marco Makaus da cumbiner in ün arrandschamaint sül lej dschiet da San Murezzan l’atmosfera d’inviern cun üna collecziun dad autos exclusivs.

Cun sustegn da la vschinauncha da San Murezzan, dal Badrutt’s Palace e d’ulteriurs sponsuors es uscheja naschieu il proget chi s’ho alura sviluppo düraunt ans e decennis. Pür dal 2019 ho gieu lö la prüm’ediziun da test – la «Demonstration Edition». E zieva la posa da corona ho gieu lö dal 2022 la prüm’ediziun ufficiela da «The Ice».

Pü e pü exclusiv

Daspö la premiera da «The Ice» es il proget gnieu sviluppo inavaunt, cun procurer per dapü attenziun e professiunalisaziun. Uossa es l’occurrenza ün punct fix i’l chalender d’arrandschamaints da San Murezzan. L’evenimaint es düraunt quels ans però dvanto eir da caracter pü exclusiv.

Ils predschs pels tickets sun gnieus uzos ed il numer da partecipantas e partecipants es gnieu limito. Our da l’ideja oriunda d’ün evenimaint persunas paschiunedas per automobils particulers s’ho sviluppo ün evenimaint chi intuna ferm eir il lifestyle exclusiv. Cha l’evenimaint crescha ad ün crescher dad an ad an, muossa però cha «The Ice» pera da gnir recepieu eir d’ün public pü vast.