Svilup dil center dil vitg da Surcuolm
Igl onn 2021 ha la suprastonza communala da Sursaissa Mundaun fixau pliras finamiras pertuccont il svilup dalla vischnaunca. Ina da quellas ei l’utilisaziun dalla casa da scola a Surcuolm. Ussa ein empremas ideas concretas persuenter sin meisa.
Survesta sil vitg da Surcuolm.
«El rom dil model directiv dil territori communal dalla vischnaunca da Sursaissa Mundaun ha la suprastonza communala fixau igl onn 2021 differentas finamiras ed instrucziuns d’agir pil svilup futur dalla vischnaunca», scriva la suprastonza communala da Sursaissa Mundaun en ina communicaziun publicada il venderdis, ils 30 da schaner 2026 el Fegl ufficial dalla Surselva. Denter quellas sesanfla era il nez futur dalla casa da scola a Surcuolm, seigi sco spazi da habitar ni intent turistic.
Sviluppau in project
Sin fundament da quella finamira han sviluppaders privats da projects ch’ein organisai ella societad da construcziun centrum dil vitg da Surcuolm preparau in project. Il project ei la basa per la revisiun parziala dalla planisaziun locala e sin fundament da quella sto l’exposiziun da cooperaziun publica suandar ussa. Parallelmein cull’entschatta dall’exposiziun publica da cooperaziun informeschan ils representants dalla societad da construcziun center dil vitg da Surcuolm persunalmein la populaziun e tuttas persunas interessadas ella casa da scola a Surcuolm davart il project. L’exposiziun publica da cooperaziun entscheiva gliendisdis, ils 9 da fevrer 2026 tier l’administraziun communala da Sursaissa Mundaun. Els acts d’exposiziun sa vegnir priu investa duront las uras d’avertura ufficialas. (fmr)
La presentaziun dil project han liug sonda, ils 7 da fevrer 2026 dallas 10.00–12.00 e 15.00–18.00; dumengia, ils 8 da fevrer 2026 dallas 10.00–12.00 e 15.00–18.00 sco era gliendisdis, 9 da fevrer 2026 dallas 16.00–18.00.
Gust da leger dapli?