Contonschiu 1000 commembras e commembers

Ils 17 da schaner 2026 ha la Cuminonza d’interess dils possessurs da secundas habitaziuns Surselva salvau sia radunonza generala. Cun occasiun da quella ha la suprastonza communicau sia finamira da contonscher 1000 commembras e commembers. Cuort suenter, la fin da schaner, ei quella finamira gia vegnida contonschida. La cuminonza representa ils interess dallas possessuras e dils possessurs da secundas habitaziuns da Breil, Ilanz/Glion, Lumnezia e Sursaissa Mundaun. Ella ei vegnida fundada igl onn 2014 ed ei carschida successivamein dapi lu.

La punt denter indigens e secundindigens

«Nossas prestaziuns en favur dallas commembras e dils commembers perschuadan adina pli fetg las possessuras ed ils possessurs da secundas habitaziuns. Era igl avegnir vegnin nus a s’engaschar per lur interess. Quei vegn ad esser il cass era en connex culla discussiun pertuccont in’eventuala taglia d’object per immobilias secundaras», vegn il president dalla cuminonza, Jörg Hertig, citaus ella communicaziun als mieds da massa. Quei duei succeder en in dialog partenari. La cuminonza vesi sesezza sco punt denter indigens e secundindigens. D’impurtonza seigi era il contact culla Surselva Turissem SA e las pendicularas. Cun ina newsletter informescha la cuminonza d’interess regularmein las commembras ed ils commembers. (cdm/fmr)