Negina loipa senza neiv artificiala

Plirs mellis meters cubics neiv ein vegni produci naven dalla fin da november per preparar ils dus tschancuns da loipa a Trun-Surrein e Mustér/Fontanivas. Grazia a quella neiv artificiala ha Nordic Surselva saviu metter a disposiziun als amitgs dalla cuorsa liunga ina loipa cun quater kilometers da Trun a Surrein ed ina cun ina lunghezia dad 1,4 km a Mustér/Fontanivas. Las reacziuns ch’il copresident da Nordic Surselva, Linard Tambornino (35) da Trun, ha retschiert per quella purschida ein lu era stadas trasatras fetg positivas: «Las relaziuns sin in ault stan e da fetg buna qualitad ein vegnidas remarcadas cun bia laud da biaras varts.» Damai che Nordic Surselva dispona d’ina suletta maschina per far loipa e che quella ei vegnida en funcziun a Trun-Surrein, eis ei stau necessari da procurar per ina secunda a Mustér/Fontanivas. Aschia ei la loipa vegnida preparada leu culla maschina che vegn schiglioc en funcziun silla via da scursalar a Mumpé Medel.

Lavur intensiva e cunscienziusa

«Ensemen culs treis menaschis communals da Trun, Sumvitg e Mustér essan nus endrizzai aschia che nus savein producir neiv artificiala naven da miez november. La cundiziun persuenter ei che las temperaturas lubeschien quei», di Linard Tambornino. Ensemen cun siu frar Eligius presidiescha el l’Uniun Nordic Surselva dapi l’entschatta dalla stagiun d’unviern 2025/26. Ils 35 onns avon eis ella stada – igl emprem sco Uniun Loipa Cadi – sut l’egida da Flurin Maissen, medemamein da Trun. Grazia a bunas cundiziuns dall’aura ha in emprem tschancun da loipa a Mustér/Fontanivas saviu vegnir aviarts ils 6 da december 2025. La fin da december eis ei lu era stau pusseivel da metter a disposiziun in tschancun loipa a Trun e cuort sissu igl entir tschancun da Trun entochen Surrein.

Ei drova era temperaturas bassas

«Senza neiv artificiala havessen nus giu ina loipa da Trun entochen Mustér sulettamein duront treis ni quater dis. La neiv dall’entschatta schaner fuss stada in bien fundament, sche las temperaturas fussen stadas bassas. Quei ei denton buca stau il cass», di Linard Tambornino ch’ei dil reminent staus da giuven campiun svizzer el sprint da cuorsa liunga dils juniors. Siu facit: «Senza neiv artificiala e la lavur intensiva e cunscienziusa dils menaschis communals havessen nus buca saviu porscher ina loipa quest unviern.» A Trun, Sumvitg/Surrein e Mustér havess quella purschida per indigens e turistas muncau. In’alternativa fuss tonaton aunc stada la loipa a Sedrun/Rueras ni quella a Campra el cantun Tessin. 

«Nus essan optimists»

Per ina loipa da quater kilometers da Trun a Surrein ed ina dad 1,4 km a Mustér/Fontanivas ein plirs mellis meters cubics neiv necessaris. Repartida vegn la neiv allura cun tracturs cun carrs da better a prau. «Che la loipa ei la fin finala vegnida aschi buna, ei ina gronda prestaziun, pertgei pli che la mesadad dallas persunas che han luvrau vidlunder quest unviern ei stada l’emprema ga dalla partida», di Linard Tambornino. Ina situaziun cun pauca neiv sco quest unviern ei en sesez buca nova, mo la tendenza cun temperaturas carschentas muossa tonaton che tals unviarns savessen serepeter aunc pli stedi. «Nus essan optimists. Igl unviern passau analisein nus mintgamai la primavera. Lu vegn era discutau tgei che sa vegnir optimau. Nus mirein dad onn tier onn e fagein il pusseivel era igl avegnir», accentuescha Linard Tambornino che lauda la motivaziun d’in team giuven ch’ei engaschaus en favur da quella purschida. El menziunescha denton era la lavur dils davos decennis da Nordic Surselva: «Nus havein surpriu in’uniun fetg bein organisada. Mintgin ha siu cudisch da pensums e sa aschia tgei ch’el ha da far.» Quei seigi il garant per ina buna purschida.