In pastget enquera fittaders novs

Uonn sa il Club da ballapei Union Trin (CBUT) festivar siu 60avel anniversari. Gl’onn 1966 han giuvens adherents da quei sport fundau il club. Per dar ballapei «endretg» ha quel duvrau ina plazza planiva cun pastget. E quella ha il club retschiert gl’onn 1994 grazia al tunnel dall’untgida Trin dil stradun digl Alpsu. Il Cantun haveva astgau deponer material excavau sin ina parcella che la vischnaunca haveva mess a disposiziun al club da ballapei. Lez ha retschiert persuenter ina plazza reschnova. «Igl ei ina bellezia plazza tgirada, situada en in liug attractiv e cun buna infrastructura», descriva il president dil CBUT, Jürg Adam, la plazza a Prau Davon. Il liug schurmegiau sut la spunda da Porclis, ei actualmein vita – e resta vita era la primavera – sch’ei dat negins fittaders novs.

Stau grev d’anflar giugadurs

Ils 14 da zercladur 2024 ha l’equipa da campiunadi dil CBUT dau siu davos match ella tschunavla ligia.«El futur vegnin nus buca pli a dar activamein ballapei cun in’equipa», ha il club communicau ufficialmein avon il davos giug. Suenter ei l’equipa da tschep sesligiada. «Ei mava buca pli, ina gada havein nus stuiu dar forfait, e gliez ei buca schi bien sch’ins ei amiez il campiunadi», raquenta Jürg Adam. Igl era vegniu pli e pli grev da rimnar ils endisch giugadurs, in suenter l’auter haveva fundau famiglia e tschentau autras prioritads.

Il CBUT actual cun ses 30 commembers dat ei dapi 2007. Suenter ch’il club vegl haveva surmuntau ina sien da plirs onns eis ei gartegiau da fundar in’equipa che trenava duas gadas ad jamna e separticipava al campiunadi regiunal. Ils davos onns ein ils juniors e giugadurs giuvens i lur vias ed il sport da ballapei ha piars l’attenziun.

Aschia eis ei buca stau d’evitar che las activitads silla biala plazza a Prau Davon mondien a digren. Il club seigi denton aunc adina activs, puntuescha Jürg Adam. Denton buca cun trenar silla plazza, mobein cun activitads polisportivas. «Nus organisein diesch tochen 12 gadas ad onn diversas sentupadas, per exempel dar curling, dar bowling, ir sin ina tura cun skis ed autras», conferma Jürg Adam. El center seigi la cumpignia, denter 15 e 20 commembers prendien adina part allas activitad, raquenta il president dil club.

Ina part dil center da sport

Pertuccont la plazza da ballapei che vegn buca pli duvrada spera Jürg Adam ch’ei detti ina buna sligiaziun. Igl ei dil reminent buca il sulet implont da sport en quei areal. La plazza da ballapei ei ina part dil center da sport Prau Davon a Trin Mulin. Gl’atun vargau han treis uniuns festivau il giubileum da 25 onns dapi l’avertura da quel. Suenter ch’il Cantun haveva construiu la plazza pils ballapedists, ein il club da tennis ed il club da skis cun sia secziun da cuorsa liunga s’associai. La plazza da ballapei ei aschia colligiada cull’infrastructura necessaria. La vischnaunca, sco possessura dalla parcella, administrescha e tgira gl’areal. Sper il pastget verd culs gols includa la purschida aunc in local da material, duas gardarobas e duas tualettas.

«La megliera sligiaziun fuss sche nus anflassen enzatgi che pren si permanentamein la plazza», tradescha Olivia Buonvicini, la canzlista da Trin. Per l’affittaziun permanenta digl implont ei la vischnaunca responsabla, per reservaziuns temporaras il club da ballapei. Jürg Adam conferma che sia uniun hagi fatg tochen gl’atun vargau il manteniment necessari. Cun visar il contract ha il CBUT returnau gl’implont alla vischnaunca.

Digl avrel tochen il november

Tagliar regularmein il pastget ei ina part che dat pauc da far, da quei s’occupa il roboter da segar. Ils luvrers communals controlleschan regularmein il center da sport e procuran che tut seigi en uorden. Silla stagiun vegnenta speran Olivia Buonvicini e Jürg Adam ch’ei detti interessents per la plazza da da ballapei. «Digl avrel tochen il november eis ella a disposiziun», gi la canzlista. Ed il president dil CBUT aschunta: «Nus havein adina tgirau quei implont cun grond quitau». Sche la plazza survess buca pli per dar ballapei, savess ella – tgisà – esser d’engrau ad autras gruppas, uniuns ni organisaziuns ch’ein dependentas d’in pastget da sport amiez il verd.