Ün SCHI zieva admuniziuns e dubis
Scu unica executiva cumünela ho quella da S-chanf arcumando da refüser la ledscha per funder la Sanadura e las cunvegnas da prestaziun per mantegner ospidel, dmuras d’attempos e spitex in Engiadin’Ota. Ma eir a S-chanf haun las votantas e votantas dit cun granda magiurited SCHI, zieva avair refüso la proposta da spuster la decisiun.
«Eau incleg cha nu’s disch gugent SCHI, scha nu s’ho otras opziuns. Ma adüna dir NA nun es neir na üna soluziun.» Que ho dit üna votanta aunz cha sun gnieus scumpartidas las cedlas da vuscher illa sela polivalenta da S-chanf. Ün’opiniun partida evidaintamaing da la magiurited da las persunas preschaintas tar la radunanza cumünela in marculdi saira. Cun 94 vuschs SCHI cunter 14 vuschs NA e 6 abstenziuns ho il suveraun approvo la ledscha per funder la nouva instituziun da dret public Sanadura respunsabla in futur pel provedimaint da sandet in Engiadin’Ota. E cun 104 vuschs SCHI cunter 7 NA eir a las trais cunvegnas da prestaziun traunter las vschinaunchas purtedras e la Sanadura per mantegner l’ospidel a Samedan, las dmuras d’attempos a Samedan e San Murezzan e la spitex.
Structuras similas
Aunz cha las votantas e’ls votants vaivan però da decider, ho la suprastanza cumünela exprimo sieus dubis e sia critica pertuchand la soluziun elavureda da las persunas respunsablas illa SGO, la fundaziun chi gestiunescha intaunt aunch’adüna l’ospidel, ma chi saro bainbod insolventa.
«Per l’ospidel essans eir nus», ho dit il president cumünel Gian Andrea Bott, «ma que chi’m disturba il pü ferm es cha la Sanadura es insè ün construct precis istess scu la SGO.» Il president cumünel ho rendieu attent als gremis previs illa Sanadura, al «cussagl da sandet» scu gremi politic chi cumpiglia danövmaing rapreschantantas e rapreschantants da tuot las ündesch vschinaunchas purtedras ed al cussagl administrativ scu gremi strategic ed operativ. «Quella structura nu pera da funcziuner in Engiadina», ho’l dit, manzunand eir la SGO e la INFRA, l’organisaziun purtedra da la plazza aviatica a Samedan. Eir quellas duos instituziuns regiunelas sun organisedas cun structuras congualablas e nun haun in l’ultim temp güst musso funcziunalited efficiainta ed exemplarica.
Adattaziuns permanentas
Gian Andrea Bott ho eir rendieu attent in radunanza a las structuras doblas chi saron avaunt maun il prossem temp – sper la Sanadura do que inavaunt eir la SGO chi restaro per exaimpel auncha ün temp possessura da las immobiglias. «Tenor las infurmaziuns ch’eau d’he clappo her, restaro la SGO auncha in vigur duos ans cun 60 impiegos.» Il president cumünel chi fo eir part dal cussagl da fundaziun tar la SGO descriva üna situaziun da reorganisaziun chi as müda da di a di, cun adattaziuns tar las cifras e prognosas d’ün mumaint a l’oter.
Scu exaimpel saja manzuno il numer da plazzas da lavur in l’ospidel. Sün üna folia preschanteda a la radunanza cumünela a S-chanf sun notedas per la gestiun da quel in avegnir auncha 148 plazzas cumplainas, aunz ün’eivna as discurriva auncha da 180 plazzas cumplainas. «A nu’s so svess na in che direcziun cha que vo, que müda da di a di», ho constato il president cumünel.
Persa d’autarchia tar las vschinaunchas
Il vicepresident cumünel, Heinz Thomas, ho auncha fat attent sün ün oter aspet da la reorganisaziun: Cha cun que cha la Fundaziun da l’Ospidel Chantunel Grischun (KSGR) surpigliaro la gestiun da l’ospidel a Samedan giaja a perder l’autarchia da las vschinaunchas ill’organisaziun dal provedimaint da sandet. «Eau sun l’ultim chi vuless serrer l’ospidel», ho dit il vicepresident, «ma da uossa davent nu varons pü da dir ünguotta. Nus pudarons be pü decider, scha lains accepter il predsch preschanto dal nouv gestiunari.»
Tenor il vicepresident es la proposta dal KSGR da principi in uorden, «il KSGR so gestiuner ün ospidel.» Ma el vess preferieu cha las vschinaunchas restessan partecipedas vi da la gestiun da l’ospidel, vi da la nouva societed acziunaria cha la fundaziun KSGR fundaro per gestiuner l’ospidel. «Ad es fich pcho cha dains our d’maun qualchosa da nossa val a glieud d’utrò.»
In quista situaziun ho l’anteriur cusglier naziunel Duri Campell proponieu a la radunanza cumünela da spuster la decisiun sün ün oter termin. «Damaun savainsa dapü e nus pudains eir pü tard auncha dir SCHI», ho’l dit, «intaunt es que be üna politica da squitsch e da temma.»
«Vus ans laschais ster illa plövgia»
Quella proposta da spuster la decisiun es però gnida sbütteda cun 65 vuschs NA cunter 27 vuschs SCHI. Ed aunz la decisiun davart Sanadura e cunvegnas da prestaziun ho ün votant auncha piglio il pled e criticho cha la suprastanza nu preschainta insembel culla arcumandaziun da sbütter la proposta üna soluziun alternativa. «Vus ans laschais ster illa plövgia», ho’l dit, «uossa stuvainsa fer ün sacrifizi. In quist cas da sanaziun stuvainsa accepter la soluziun preschanteda.» Sia constataziun ho racolt illa sela polivalenta ün applaus spontan.
Il pü tard zieva quel saro sto cler cha l’opposiziun da la suprastanza cumünela cunter la Sanadura nu’s spievla tar il suveraun. Eir S-chanf dvainta part da la nouva organisaziun chi dess garantir in futur il provedimaint da sandet in Engiadin’Ota. Ed eir S-chanf vo d’accord cun las cunvegnas da prestaziun pel rest da quist an.
Gust da leger dapli?