Suenter la sbarrada en casa cumin
Vendergis ha ina gruppa d’iniziants inoltrau en Casa Cumin a Glion ina petiziun. La surdada dalla scatla culs formulars dalla rimnada e las 1686 suttascripziuns ha ina persuna dil comité vuliu documentar. Ella ha era filmau la reacziun dil president communal Marcus Beer. Lez fa ussa al parlament la damonda da confidonza.
Gie, el hagi giu reacziuns, massa reacziuns, la gronda part denton d’anoragiu, paucas tochen fetg paucas dalla Surselva e dalla vischnaunca, confirmescha Marcus Beer. Il president communal dad Ilanz/Glion ha giu ina fin d’jamna malruasseivla. Gliendisgis endamaun ha el tratg ina bilanza mischedada d’ina sentupada da vendergis endamaun.
Ella havessi mai spitgau ina tala reacziun, declara era Ingrid Albin-Cavigelli da Siat. Ella fa part dil comité che ha rimnau suttascripziuns e surdau quellas vendergis als representants dalla vischnaunca dad Ilanz/Glion. Ella manegia la reacziun dil president communal. Per la surdada ha quel envidau il comité en Casa Cumin. Cun prender encunter la scatla culs formulars che 1686 persunas han suttascret, ei Marcus Beer vegnius en fiug. Co e sin tgi ch’el ha sevilau ha in video mussau ch’ina persuna presenta ha fatg. Il president communal dat ina taffra reprimanda als seniors, quels seigien egoists e prendien buca risguard silla giuventetgna che stoppi finanziar tuttas expensas.
Digitalisaziun ha fatg effect
Il video hagi vuliu documentar oriundamein il mument legreivel dalla surdada dalla petiziun, confirmescha Ingrid Albin-Cavigelli. Il beinvegni asper culla vusch cargada dil president communal ha fatg in effect e la digitalisaziun ha funcziunau exemplarmein: Spert ha il video anflau la via ella redacziun dalla gasetta Blick.ch. Aschia ei la caussa sco tala, il cuntegn dalla petiziun, ida suten. Mo pli sin plazza fiera ed en singuls loghens a Glion duein ils automobilists saver pagar la taxa da parcar cun muneida. Quell’intenziun ha provocau la rimnada da suttascripziun. En vesta alla digitalisaziun che progredescha ha la vischnaunca dad Ilanz/Glion elaborau in concept per sias uras da parcar.
Garantir l’inclusiun
Pli e pli biars pagan la taxa cun ina applicaziun digitala e senza raps. Per suandar las disas vul la vischnaunca reducir las petgas cun muneida. Che buca tuts ein cuntents cun quell’optimaziun previda muossa la petiziun. Ingrid Albin-Cavigelli confirmescha che 1686 persunas hagien suttascret quella. «Bia glieud ei surdumandada cun quei mied da pagar. La glieud che ha in impediment ei dependenta da saver pagar cun muneida en loghens nua ch’ella sto ir», gi la coninizianta. L’inclusiun stoppi esser garantida, lu seigi gest per tuts, puntuescha ella.
Ein tut quellas persunas che han suttascret la petiziun domiciliadas ella vischnaunca dad Ilanz/Glion? «920 persunas han il domicil en nossa vischnaunca», confirmescha la coninizianta dalla petiziun vinavon. Las ulteriuras 666 suttascripziuns seigien da glieud d’ordeifer. Tenor Ingrid Albin-Cavigelli ha quella gest tuttina peisa per la caussa. Ella puntuescha la muntada da Glion. «La glieud che parchescha a Glion vegn buca mo da nossas fracziuns, mobein siado dalla Bassa, dall’entira Surselva, ils habitonts secundars e hosps da vacanzas vegnan a Glion, per tuts eis ei in center», declara ella. La dunna che habitescha a Siat numna aunc in’auter argument: «Glieud dalla Tiaratudestga ni d’autras tiaras enconuschan buca nos sistems digitals sco per exempel Twint, quella sa pagar mo cun muneida.»
La damonda da confidonza
E tgei conclusiun trai Marcus Beer da quella sentupada che ha caschunau ina fin d’jamna turbulenta? «Jeu sai che mia reacziun impulsiva ei stada fallida e ch’jeu hai reagiu en quei mument memia pauc professiunal», lai el valer en discuors culla FMR. El seigi semplamein in tip memia emoziunal, aschunta el. Ed ussa, trai el consequenzas persunalas pervia da quella scarpitschada? In plogn encunter la derasaziun buc autorisada dil video fa el perinagada buca, sco persuna publica hagi el paucas schanzas da survegnir raschun, declara Marcus Beer. El tradescha in’autra consequenza: «Mesjamna, ils 18 da fevrer, s’entaupa nossa legislativa communala. Cun quella caschun vegn jeu a tschentar al parlament la damonda da confidonza. Sche la maioritad giavischa ch’jeu demissiuneschi, vegn jeu a far quei», gi Marcus Beer. Il matg 2025 ha il pievel da Glion reeligiu el per la perioda d’uffeci actuala 2026 – 2029. Il november 2022 haveva Marcus Beer gudignau la lutga encunter Claudio Quinter pil presidi communal. El ha surpriu quei post da Carmelia Maissen ch’ei ida ella regenza grischuna.
Gust da leger dapli?