Bainbaud èsi visibel online nua ch’ils radars mesiran noss tempo
Per incumbensa da la Regenza lantscha la Polizia chantunala durant ils proxims tschintg mais in experiment en la vigilanza dal traffic. Ina part dals lieus, nua che indrizs da mesiraziun da sveltezza stattan, duessan vegnir publitgads online. La finamira è da cumparegliar surpassaments da la sveltezza cun e senza inditgar ils lieus.
«Cunquai ch’il è in’incumbensa dal Chantun stuain nus far quai», declera il schef da la Polizia da traffic chantunala dal Grischun, Lukas Christen. Tar l’incumbensa vai per ina emprova da pilot davart las mesiraziuns da sveltezza. Durant tschintg mais duess la Polizia chantunala dal Grischun publitgar ina schelta da lieus, nua che indrizs da mesiraziun da la sveltezza semistaziunars èn plazzads. Quai pon ins leger en ina communicaziun da la Polizia chantunala da mardi.
Plinavant communitgescha la Polizia che l’emprova da pilot cumenza il 1. da mars 2026 e dura 5 mais. Sin la pagina d’internet da la Polizia chantunala dal Grischun vegnan publitgads ils lieus e las vias, nua ch’ils indrizs da mesiraziun da la sveltezza semistaziunars èn plazzads. Exceptads èn lieus en la vischinanza d’ospitals, da chasas da persunas attempadas e da tgira, da scolas e da scolinas.
Radars be per motivs finanzials
Il giavisch da stgaffir dapli transparenza tar las controllas da radar è vegnì da la PPS. Tranter auter ha il deputà da la PPS dal Cussegl grond Jan Koch argumentà che las controllas da sveltezza dal traffic sin via sajan in impurtant instrument per augmentar la segirezza. Questas controllas vegnian dentant era crititgadas da blera glieud, perquai ch’ins possia survegnir il sentiment ch’ellas vegnian fatgas per motivs finanzials. E per stgaffir dapli transparenza dessan ils lieus dals indrizs semistaziunars a partir dad ussa vegnir publitgads. Plinavant duess la polizia era tegnair si las glistas per pudair cumprovar ch’i saja vegnì controllà en lieus relevants e betg mo per far raps.
Differentas mesiraziuns
Per pudair cumparegliar ils surpassaments da la sveltezza cun e senza inditgar il lieu, ston singulas mesiraziuns da l’emprova da pilot vegnir fatgas en ils medems lieus sco l’onn avant. En l’evaluaziun vegnan ils vehichels era zavrads tenor lur derivanza (chantun Grischun, rest da la Svizra ed exteriur). Relevants per l’evaluaziun èn era facturs betg influenzabels, sco l’aura, la temperatura u il temp da vacanzas.
La prevenziun è impurtanta e betg ils raps
Il schef da la Polizia da traffic Lukas Christen è dentant anc sceptic ch’i vegnia propi a dar grondas surpraisas: «Jau sun da l’opiniun da betg publitgar ils lieus per pudair mantegnair l’effect da la prevenziun. Dentant pudessi er esser che questa pagina, nua ch’ils indrizs vegnan publitgads, survegn tants clics ed uschia dapli glieud che fa attenziun ch’il effect da la prevenziun pudess er uschia funcziunar.»
Che questa glista publica haja in effect sin la vart finanziala, na craja Lukas Christen betg. «Jau hai gì contact cun divers collegas dad auters chantuns che han gia mess en vigur talas glistas publicas. Quels n’han betg badà ina gronda differenza dal numer da surpassaments dal tempo.»
«Nus essan la fin finala quels che pon rapportar co ch’il project da pilot cun inditgar ils lieus dals radars ha funcziunà e communitgar al Cussegl grond tge ch’i fiss noss giavisch per il futur.»
Lukas Christen, schef da la Polizia chantunala da traffic dal grischun.
Dapli lavur per la Polizia
En in’emprima varianta da la dumonda da la PPS era previs che la Polizia avess gì da publitgar mintga midament dad in indriz semistaziunar entaifer in’ura. «Quai n’è betg realistic», declera il schef da la Polizia da traffic. «Noss policists fan las dischlocaziuns da quests apparats e vegnan lura en biro. Pir lura pon els purtar en la glista online, nua ch’il indriz sa chatta. Quai dat en mintga cas dapli lavur», declera Lukas Christen e relativescha vinavant: «Dad actualisar quai uschia svelt na fa era perquai nagin senn, perquai che quests indriz stattan pel solit tranter ina fin trais emnas al medem lieu.»
En il rom da l’emprova da pilot duain vegnir rimnadas experientschas ed a medem temp vegnir analisadas las experientschas d’auters chantuns. La Polizia chantunala sto alura suenter la fasa da pilot far in rapport d’evaluaziun. «Nus essan la fin finala quels che pon rapportar co ch’il project da pilot cun inditgar ils lieus dals radars ha funcziunà e communitgar al Cussegl grond tge ch’i fiss noss giavisch per il futur», declera Lukas Christen.
Gust da leger dapli?