Il parlament dad Ilanz/Glion sa buca decider

Il video che muossa il president communal da Glion Marcus Beer a sevilond sillas representantas e sils representants dalla petiziun per pagar ils parcadis cun daners bluts ei vegnius transportaus via medias per l’entira Svizra entuorn. Ier mardis endamaun ha ina communicaziun dalla Casa Cumin da Glion contonschiu las medias. Speditur da quella ei il president communal Marcus Beer che seperstgisa. El hagi buca giu sut controlla sesez duront la surdada dalla petiziun. «Igl ei buca reussiu a mi en quei mument da satisfar a mia rolla sco president communal», scriva Marcus Beer ella communicaziun. Ed el fa da saver ch’el vegli tschentar la damonda da confidonza al parlament communal che seraduni en in’jamna ils 18 da fevrer 2026 tier sia emprema sesida dalla nova legislatura.

La basa legala maunca

Sco sin palancau federal e cantunal stat ei era a Glion scret negliu ella lescha dil parlament communal che quel seigi cumpetents da tractar ina damonda da confidonza dalla suprastonza ni d’in singul commember dalla suprastonza communala. Era Damian Manser digl Uffeci da vischnauncas dil Grischun confirmescha che la damonda da confidonza che Marcus Beer vegli tschentar al parlament Ilanz/Glion hagi negina basa legala el senn d’ina damonda ufficiala sco en autras tiaras. Cheu setracti ei plitost d’ina damonda politica, di Damian Manser. «Igl ei ina damonda politica e buc ina damonda giuridica, sch’in president communal vul constatar, sch’el ei aunc acceptaus en siu uffeci ni buc.»

Negin connex instituziunal

Andreas Glaser ei professer da dretg en plirs roms all’universitad da Turitg. El ei expert dil dretg public e meina era il Centre for Research on Direct Democracy en il Center per Democrazia ad Aarau (CPD). El ch’enconuscha fetg bein la Surselva e sias instituziuns di, ch’ins sappi sedumandar, sch’il parlament dad Ilanz/Glion astgi insumma tractar quella «damonda da confidonza». Sil livel communal detti ei negin connex instituziunal denter parlament e suprastonza. «Jeu dubetel denton ch’ins astga insumma far in tala damonda. Il parlament vess en mintga cass il bien dretg da refusar da s’exprimer en quella caussa. Il parlament savess refusar d’entrar ella discussiun. Sch’il parlament vul propi exprimer siu sustegn, san ins probablamein buca scumandar quei.»

Quei dat ei buc tier nus

Tenor il professer da dretg Andreas Glaser exista la damonda da confidonza en sistems parlamentars. En Svizra detti ei buca la damonda da confidonza, gnanc sin livel federal nua che la regenza vegn eligida dil parlament. «Els cantuns ei la damonda da confidonza aunc pli disfuncziunala, perquei che la regenza vegn eligida dil pievel.» En certs cantuns, per exempel el Grischun, dat ei tenor Andreas Glaser sil livel cantunal in instrument corrispundent, denton vice versa alla damonda da confidonza. «Il Cussegl grond sa realisar ina procedura da destituziun encunter in singul commember dalla Regenza ed aschia allontanar la persuna ord igl uffeci. In commember dalla Regenza sa denton buca tschentar la damonda dad el anora. Il Cussegl grond sto iniziar la procedura.»

Negina tractanda

Il niev parlament dad Ilanz/Glion seraduna la proxima mesjamna tier sia emprema sesida dalla legislatura nova. Igl anteriur president dil parlament Daniel Candinas di che tenor el sappi il parlament buca votar ils 18 da fevrer 2026 sur d’ina damonda da confidonza dil president communal. Quei seigi era buca tractandau e las tractandas dalla proxima sesida seigien gia publicadas, di Daniel Candinas. «Tractandas dil parlament san tenor mia capientscha mo parlamentarias ni parlamentaris pretender.»

Negina decisiun

Flavio Elvedi da Glion entra en uffeci ils 18 da fevrer 2026 sco niev president dil parlament e successur da Daniel Candinas. Pertuccont la damonda da confidonza dil president communal vegni el a tschercar il discuors cun Marcus Beer avon la sesida dil parlament. «La basa legala ei buca dada per che nus sco parlament sappien prender ina decisiun en quella caussa», di Flavio Elvedi.

Pigl expert da dretg public e professer da dretg alla Universitad da Turitg Andreas Glaser dat mo ina alternativa alla damonda da confidonza. «La suletta alternativa per Marcus Beer fuss da demissiunar e da candidar puspei en ina elecziun cumplementara. Tras la demissiun savess el dar al pievel da Glion, sco tgierp electoral, la pusseivladad da s’exprimer davart la confidonza en el.»