La Regiun sto far las lezchas necessarias

L’Uffizi da scussiun e fallimaint Engiadina Bassa/Val Müstair nun ha pel mumaint ingün persunal. Il manader da l’uffizi ha bandunà sia plazza davo pac temp, sia successura es eir absainta. Perquai ha il Tribunal superiur dal chantun Grischun decis d’incuort cha l’uffizi da scussiun e fallimaint vain manà per la dürada d’ün on da l’uffizi regiunal Plessur a Cuoira.

In üna charta da lecturs illa Posta Ladina vain fat valair cha’ls respunsabels da la Regiun Engiadina Bassa/Val Müstair (EBVM) hajan manchantà da planisar a temp la successiun dal manader da l’uffizi da scussiun e fallimaint chi’d es stat blers ons in carica e chi’d es i la stà passada in pensiun. Quists imbüttamaints nu lascha la presidenta da la Regiun EBVM, Gabriella Binkert Becchetti, valair: «Nus vaivan planisà la successiun. Però la suppleanta chi vess fat las scolaziuns necessarias per surtour la plazza da manadra ha desdit la plazza in Engiadina Bassa ed ha surtut la listessa carica in Engiadin’Ota. Perquai vaina scrit oura la plazza ed eir chattà ad üna persuna adattada chi vulaiva tuornar in Engiadina a lavurar.» Cha quista persuna banduna la plazza dürant il temp da prouva nu d’eira previs, declera Gabriella Binkert Becchetti. Neir brich cha la suppleanta actuala saja absainta.

Buna soluziun intermediara

«Nus eschan adüna stats in stret contact cul Tribunal superiur dal Grischun, chi ha suot sai eir la survaglianza professiunala dals uffizis da scussiun. Ed uschea vaina chattà üna buna soluziun intermediara cun l’uffizi regiunal Plessur a Cuoira», declera la presidenta da la Regiun EBVM. Il nouv manader haja eir gnü sustegn extern da Cuoira, avant ch’el haja bandunà la mità da schner l’uffizi. Sco cha Gabriella Binkert Becchetti quinta, gnia bainbod scritta oura la plazza da manadra o manader da l’uffizi da scussiun e fallimaint cul böt da chattar svelt üna soluziun per avair temp avuonda per lavurar aint la nouva persuna e dar la pussibiltà da far las scolaziuns necessarias. Il böt saja cha la nouva manadra o il nouv manader possa lavurar lura in ün on independentamaing. Il sustegn dal Tribunal superiur e da l’uffizi regiunal Plessur dürant l’introducziun d’ün nouv manader d’uffizi saja fich important.

Adattar l’infrastructura

In sia decisiun dals 26 schner 2026 criticha il Tribunal superiur dal chantun Grischun eir las localitats e l’infrastructura da l’Uffizi da scussiun e fallimaint Engiadina Bassa/Val Müstair a Scuol: La sgürezza dal persunal da l’uffizi nu saja garantida e chi manca ün fanestrigl sgürà chi protegia eir las datas. Il Tribunal superiur supplicha a la Regiun EBVM dad adattar las localitats infra temp ütil. Inschinà gnian trattas ulteriuras masüras da survaglianza in consideraziun.

La necessità d’agir es consciainta eir a la presidenta da la Regiun EBVM. Sco ch’ella declera, saja il Cumün da Scuol possessur da la Chasa Du Parc ingio cha la Regiun EBVM e l’uffizi da scussiun e fallimaint es a fit. I’l rom dal proget per ingrondir la chasa da scoula saja previs dad adattar e renovar eir la chasa cumünala e la Chasa Du Parc. Previs saja stat da far in quel connex eir ils adattamaints necessaris pro l’uffizi da scussiun e fallimaint. «Uossa stuvaina però reagir ouravant», disch Gabriella Binkert Becchetti. Cha da spettar fin cha’l proget da scoula gnia realisà, düra massa lönch. «Nus stuvain realisar las masüras cha’l Tribunal superiur pretenda», decler’la. Sco ch’ella quinta, sajan las prümas masüras vi da la porta d’entrada fingià gnüdas realisadas. Sco prossem gnarà realisà ün fanestrigl.

Ingüna fusiun dals uffizis

Da nüzziar il mumaint e tscherchar üna stretta collavuraziun a lunga vista cun ün uffizi dad ün’otra regiun, per exaimpel cun l’Engiadin’Ota, nu vain per Gabriella Binkert Becchetti in dumonda. «Nos böt es da tegner la cumpetenza e las plazzas da lavur in nossa regiun», disch ella. Schi fetscha propa dabsögn, as possa bainschi prolungar la collavuraziun cun l’uffizi regiunal Plessur, ma a lunga vista saja il böt da mantegner l’uffizi a Scuol.

Fin uossa vaiva l’Uffizi da scussiun e fallimaint Engiadina Bassa/Val Müstair eir ün büro in Val Müstair. «Quel pudaina reactivar, schi fa dabsögn», disch la presidenta da la Regiun EBVM. Üna fusiun dals uffizis cun l’Engiadin’Ota nu saja actualmaing ingün’opziun. «Eir l’Engiadin’Ota ha gnü müdamaints da persunal ed i manca eir la scolaziun necessaria», quinta Gabriella Binkert Becchetti. «Nus fain uossa nossas lezchas ed eschan persvas da chattar üna buna soluziun», agiundsch’la. Fin als 31 schner 2027 es l’uffizi regiunal Plessur respunsabel per l’andamaint da l’Uffizi da scussiun e fallimaint Engiadina Bassa/Val Müstair.