Il nouv motor es già pusto

La buna novited il prüm: Ün nouv motor es già gnieu pusto e quel dess gnir fabricho aint quista sted, uschè cha’l manaschi dal runel Survih dess pudair funcziuner darcho scu üsito quista stagiun chi vain. Positiv es eir cha’l lift da pony funcziuna scu üsito, uschè cha la scoula da skis pels pü pitschens vain mneda inavaunt. Eir il restorant es aviert.

L’an 2010 ho que do sü Survih ün nouv runel per las pistas sü sur Samedan. Normelmaing vess ün tel runel da tegner var 25 ans, ma quist cò es uossa ruot, e quelo già zieva 16 ans in funcziun. Il territori da skis sü sur Samedan es be pitschen, ma ideel per famiglias ed iffaunts chi imprendan ad ir culs skis u cul snowboard.

Dapü cu 100’000 muvimaints per stagiun

Stagiun per stagiun quinta il runel a Samedan in media intuorn 105’000 frequenzas. Quist an es il manaschi gnieu freno abruptamaing dad ün frain ruot i’l motor – e quelo immez la stagiun. Que deplorescha ün dals respunsabels pel runel, Michele Mattaboni. «Ad es ruot ün frain i’l motor, chi nu vess insè gieu da rumper. Tenor il fabricant da quist runel füss quista part steda üna chi nu bsögna chüra e chi vess insè da tegner almain 25 ans.»

Perche chi’d es ruot il frain, nun ho pudieu gnir eruieu. Cler saja però, uschè Martin Merz, il president da la societed d’aczias dal runel Survih, cha sainza il frain nu’s possa lascher ir il runel. «Scha’l frain es ruot, nu vo il runel, que es üna sgürezza dobla.» Tuot il mantegnimaint saja gnieu fat tenor las prescripziuns da las autoriteds, fo Martin Merz valair.

Cuosts e fabrica quista sted

Quaunt ch’ün tel motor cuosta nu po Martin Merz, il president da la societed d’aczias chi mantegna il runel daspö l’an 1958, auncha dir. «L’offerta es in viedi.» Scha la SA dal runel Survih stu pajer tuot svessa u scha la sgüraunza surpiglia qualchosa, nu saja auncha cler, disch Martin Merz. Tiers ils cuosts dad ün nouv motor vegn natürelmaing eir auncha la perdita da las entredas da las skiunzas e dals skiunzs da quista stagiun. «A tuot quels chi vaivan cumpro ün abunamaint, dainsa üna bunificaziun», declera Martin Merz.

Ma almain es già cler cha que do ün nouv motor. E quel gnaregia monto quista sted, uschè cha’l runel sü Suvih es alura darcho pront per quist’inviern chi vain.