Ni plum ni discussiun

Igl ei stau l’88avla sesida dapi la fusiun dalla vischnaunca Ilanz/Glion avon varga 12 onns. Ed igl ei stau ina culs pli biars hosps. Quels han vuliu tedlar la sentenzia e la reprimanda ufficiala dil parlament al president communal Marcus Beer.

Denton dallas 19.00 tochen suenter las 22.00 han ils biars hosps «stuiu» tedlar ell’aula dalla casa da scola a Glion las elecziuns e duas ulteriuras tractandas administrativas (mira scaffa). «Nus surpassassen nossas cumpetenzas enviers la populaziun, las votantas ed ils votants. Tenor artechel 31 alinea 1 da nossa constituziun ei la cuminonza all’urna autorisada d’eleger il presidi communal», ha il niev president dil parlament, Flavio Elvedi, lu declarau allas 22.24 e serrau la sesida. Senza ni plum, ni reprimanda e sentenzia.

Spitgau adumbatten

Mintg’auter meins s’entaupa il parlament communal da Glion per tractar las fatschentas ch’ein en sia cumpetenza. Per damondas da confidonza ni disfidonza al presidi communal seigi il parlament buca cumpetents, ha il niev parsura Flavio Elvedi puntuau. Immediatamein suenter sia elecziun ha el priu plaz silla sutga che siu antecessur Daniel Candinas ha occupau ils dus onns vargai.

Las sesidas ell’aula dalla casa da scola ein publicas, ed ella media sesan circa sis persunas ellas retschas dils hosps. Mesjamna sera ein bunamein 60 persunas e representantas e representants da medias vegni. Quellas spitgavan ina discussiun pervia d’in cass ch’ei schabegiaus dacuort en casa cumin. Ellas han denton spitgau adumbatten.

Ils 6 da fevrer 2026 haveva in comité purtau leu ina petiziun pertuccont il concept da parcar digital e pagar senza muneida ella vischnaunca Ilanz/Glion. Il president communal Marcus Beer haveva beneventau la gruppa cun ina sevilada. Quei ha ina persuna filmau e tarmess la scena a biaras medias, denter auter era al Blick. Il video cul president alterau ei sederasaus via la gasetta da bulvard – ed ha caschunau vivas discussiuns ell’entira Svizra.

Puspei seperstgisaus

Sin quei ha il president communal da Glion giu ina fin d’jamna turbulenta. El ei lu, cun ina communicaziun ufficiala, seperstgisaus, siu sedepurtar seigi buca staus corrects, el hagi, cun siu fiug persunal ed ell’alteraziun, piars la controlla dalla emoziuns. Sco persuna publica ha el denton giu negina schanza da purtar plogn pervia dil film ch’ei ius virtualmein e zuppadamein alla gasetta Blick.

«Ussa tier la surdada dalla petiziun», ha il president communal getg mesjamna sera allas 22.15, tier la tractanda «Informaziuns dalla suprastonza communala». Suenter entginas autras eis el vegnius tier la spina ella plaga. Ellas retschas dils hosps ei la tensiun carschida. «Finalmein vegn gl’essenzial», po enqual haver patertgau. «Nus vegnin ad examinar las suttascripziuns dalla petiziun e prender in conclus en caussa», ha Marcus Beer introduciu e cuntinuau: «Da quei ch’ei schabegiau a caschun dalla surdada hai jeu gia dau giu mia declaronza ella communicaziun ufficiala. Jeu hai reagiu nun-professiunalmein e seperstgisel pervia da quei», ha Marcus Beer puntuau. El hagi seschau eleger il matg vargau per ina nova perioda d’uffeci da quater onns e seigi promts da s’engaschar vinavon pil bien dalla vischnaunca. El hagi denton era neginas breigias d’acceptar, sch’il parlament giavischi ch’el demissiuneschi.

La basa legala maunca

Ils hosps ch’ein vegni en emprema lingia pervia da quei cass, han spitgau ch’il president dil parlament arvi la discussiun per prender in conclus. Nuot da quei ei schabegiau. Ni sentenzia, ni confidonza ni il plum ha ei dau. Perquei ch’il president dil parlament ha mess la situaziun sil punct: «Jeu prendel notizia dalla damonda dil president communal, sai denton buc entrar en quella, ed era buca lubir ni ina discussiun ni ina votaziun. Perquei ch’il parlament ei semplamein buc autorisaus leutier e ch’ei maunca ina basa legala leutier.» Aschia che la caussa ei – silmeins ella sesida dil parlament da mesjamna sera – vegnida messa ad acta.