Varga 100 cantaduras e cantadurs a Trun
Biebein 80 dunnas e 20 umens han frequentau sonda vargada igl emprem di da cant dil District da cant Surselva. Ed il magnific chor ad hoc ha exercitau duront tschun uras sut la direcziun da Flavia Walder e Clau Scherrer.
Cantaduras e cantadurs naven da Cuera e plinengiu entochen Tujetsch ein viagiai a Trun ella sala da cultura per seperfecziunar ed emprender canzuns novas ch’ein vegnidas inoltradas al davos Festival da la chanzun rumantscha 2025 a Vella. Sper il cant hai era dau la caschun da gentar da cuminonza e da cultivar contacts vegls e novs. L’aura da neiv e plievgia dalla sonda ei stada ideala per in di da cant.
Lavur da motivaziun
Per Clau Scherrer e Flavia Walder sco menaders musicals dil di da cant eis ei stau ina biala experientscha da saver beneventar tonta glieud enina. Clau Scherrer: «Tuttenina eran varga 100 dunnas ed umens en sala. Els ein fetg differents mo han igl interess communabel da cantar e far musica e da vegnir in ni dus pass vinavon enteifer quellas uras.» Flavia Walder ha detg ch’ella seigi surstada dalla motivaziun da quellas e quels che seigien vegni. «Jeu percepeschel che las cantaduras ed ils cantadurs ein fetg concentrai e senz’auter promts da seschar en cun canzuns novas.»
Differentas activitads
Il district da cant e l’Uniun ceciliana Surselva porscha era ina scolaziun da cantar per tuttas commembras e commembers dils chors sursilvans. Quella vegn procurada dalla cantadura professiunala Letizia Scherrer en collaboraziun culla Scola da musica Surselva. Daniel Pally di che circa diesch chors hagien gia fatg diever igl onn vargau da quella scolaziun ed ils resuns seigien positivs. La scolaziun individuala cuntegn ina lecziun generala cugl entir chor. Ellas emprovas sissu dat ei ina instrucziun da cant da 20 minutas cun mintga commembra ni commember interessau. Tgi che vul, sa lu frequentar ulteriuras uras da cant tier Letizia Scherrer ni alla Scola da musica Surselva.
Niev slontsch
Cul di da cant ha il District da cant Surselva la finamira da dar niev slontsch alla veta dils chors en Surselva. Cantar en in chor duei colligiar aunc pli fetg. Sper il di da cant porschan il district da cant e l’Uniun ceciliana Surselva era ina scolaziun da cantar per tuttas commembras e commembers dils chors sursilvans. Quella scolaziun individuala cuntegn ina lecziun generala cugl entir chor. Ellas emprovas sissu dat ei ina instrucziun da cant da 20 minutas cun mintga commembra ni commember interessau.
Litteratura nova
Las canzuns ch’il chor dil di da cant a Trun ha empriu d’enconuscher ein cumposiziuns novas. Ei setracta da canzuns inoltradas al Festival da la chanzun rumantscha digl atun 2025 a Vella. La gronda part dil chor ad hoc a Trun eran cantaduras e cantadurs da chors sursilvans. Flavia Walder e Clau Scherrer quentan che las dirigentas ed ils dirigents sursilvans vegnan a luvrar en lur chors era cun quellas canzuns d’auturs e cumponists contemporans. Tenor ils responsabels dil District da cant Surselva duei il proxim di da cant haver liug igl onn 2027.
«Jeu vegn puspei l’auter onn»
«Sch’ei dat in proxim di da cant ed jeu sun en gamba, vegn jeu l’auter onn puspei al di da cant», han pliras participontas e participonts detg sin damonda dalla FMR. Il di da cant a Trun culla pusseivladad da far enconuschientscha cun canzuns novas ha plaschiu.
Silvia Derungs, Uors
Jeu contel bugen en cumpignia. E tgei che plai a mi ei da cantar inagada en tut in’autra formaziun. A mi ha era plaschiu da cantar cun auters dirigents ed en in ambient tut niev. L’idea da far in di da cant ei geniala. Jeu s’occupeschel era bugen cun las novas canzuns presentadas al davos Festival da la chanzun rumantscha. Jeu sun stada fetg surstada cura ch’jeu haiel udiu che varga 100 persunas prendien part. Mo ussa haiel jeu viu ch’els han propi sligiau bein quei.
Ramun Venzin, Trun
Quei ch’jeu haiel percepiu entochen ussa ei fetg bien. Igl ei bi da cantar cun Flavia Walder e Clau Scherrer. Las canzuns ei denteren da quellas in tec pli specialas ch’ins auda buca mintga di. Vitier vegn ch’igl ei oz in di da neiv ch’ins sa far nuot meglier che cantar. A mi plai fetg bein, schegie ch’ils umens ein ella gronda minoritad. Mo tier quels ch’ein cheu setract’ei dils buns cantadurs sursilvans.
Alice Bertogg, Sevgein
Sco suprastonta dall’ Uniun da cant districtuala Surselva sun jeu fetg satisfatga e tilel ina bilanza fetg positiva da quei di. Varga 100 participontas e participonts ei stau ina gronda surpresa positiva per mei. Igl ei fetg special da cantar en in chor cun cantaduras e cantadurs ch’ins ha aunc mai cantau ensemen. Fetg positiv ei era che nus savein far enconuschientscha cheu cun las canzuns dil Festival dalla chanzun rumantscha a Vella. Cheu eisi segir reussiu alla dirigenta ed al dirigent d’avischinar la glieud a quellas cumposiziuns e cunquei era rumper empau las resalvas.
Sandra Decurtins, Trun
Sco biars auters sun era jeu surstada a moda e maniera positiva da quei di da cant. Jeu smarvegliel con spert ch’il temps varga. Nus havein cantau duas uras e quei ei vargau en in hui. Quei ei in bien segn. Nies district da cant ha giu ina fetg buna idea. Cun in tal di promov’ins il cant e cultivescha las vuschs. Da l’autra vart promov’ins era la cumpignia ed il brat denter cantaduras e cantadurs.
Yvonne Hunger, Vuorz
Il di da cant ei in’occurrenza fetg bein gartegiada. Igl ei ina nova experientscha che nus tuts fagein. Cura ch’igl ei stau da decider havein nus decidiu entginas ensemen da prender part. Quei ch’jeu haiel udiu era da mias collegas, ein tuttas incantadas, nus gudin e selegrein ussa silla secunda part dil suentermiezdi.
Hans Peter Capatt, Trin
Mei han surtut era las novas canzuns interessau. Ed jeu sun era staus spanegiaus co Flavia Walder e Clau Scherrer lavuran cun las novas canzuns cun nies chor ad hoc. Igl ei ina atmosfera fetg amicabla, cordiala denter la famiglia da cantaduras e cantadurs. Igl impuls impurtont ei da far enconuschientscha cun canzuns novas che vegnan tenor mei cantadas memia pauc. Forsa ch’ei dat persunas ch’ein stadas cheu che prendan cun ellas las canzuns ed animeschan lur dirigents da cantar quellas culs chors. A mi ha il gi dad oz plaschiu fetg bein
Gust da leger dapli?