Medel/Lucmagn ei top of Switzerland

En tgei marcau ni vischnaunca svizra sa ina famiglia viver il pli favoreivel? Cun quella damonda ei la redacziun dil «Beobachter» sefatschentada che ha publicau ils resultats dallas examinaziuns ell’ediziun dils 19 da fevrer 2026.

Absolut top en quei grau ei ina vischnaunca sursilvana che la pluralitad da Svizras e Svizzers enconuschan pli probabel buc. En quei cass sa ei secapescha buca setractar dalla vischnaunca da Laax cun siu pei da taglia da 40 %. La taglia che habitontas e habitonts han da pagar ein sulet in da plirs facturs che decidan con ch’ina famiglia ha da sbursar onn per onn per sia existenza.

Ils calculaders dil «Beobachter» han risguardau, sper la taglia, er ils cuosts da habitar e las premias per la cassa da malsauns. Ed els ein vegni alla conclusiun che Medel/Lucmagn ei en connex cun quels cuosts: «Top of Switzerland »

Grondas differenzas

Ella vischnaunca Medel/Lucmagn paga ina famiglia da classa mesauna en media 3000 francs per habitar, per la taglia e per la cassa da malsauns. Quei stat visavi alla vischnaunca da Commugny al Lag da Genevra nua che la medema famiglia paga 7000 francs per meins.

La novitad che sia vischnaunca seigi la pli favoreivla ha il president communal, Claudio Simonet, priu encunter cun ina certa cuntentientscha, sco quei ch’el s’exprima viers la FMR. Vid il zenn grond vul el lu tuttina buca pender quella novitad ed il president communal resta mudests. «Il schurnalist dil Beobachter ha atgnamein vuliu vegnir ella val per rapportar.» Claudio Simonet ha buca gest discussegliau al schurnalist da far il viadi ella Val Medel. «Jeu hai denton fatg attent ch’ei detti sper la taglia, ils cuosts da habitar e las premias dallas cassas da malsauns aunc auters facturs da cuosts che plaidien denton buc exnum per Medel/Lucmagn.»

Claudio Simonet menziunescha il liug empau giud via dalla Val Medel che pretendi liungs e magari stentus viadis per ir alla lavur ni per contonscher in center urban. Viers il «Beobachter» ha il president communal era plidentau ils aults cuosts da scaldar duront igl unviern ed ils survetschs mudests che stattan a disposiziun alla populaziun.

Habitadis tschercai

Forsa ei il president communal da Medel/Lucmagn tuttavia memia mudests. La vischnaunca Medel/Lucmagn ha en plirs graus numnadamein fatg ses pensums da casa. Ella ha scaffiu spazi da habitar en casa communala, en scola ed era en scoletta. «Quellas habitaziuns ein ordvart tschercadas.»

Claudio Simonet gi che la plipart dallas habitaziuns seigien affittadas ad indigenas ed indigens. «Il rest han emploiadas ed emploiai che lavuran ella val ni ella regiun priu a tscheins.» Il president communal menziunescha era la planisaziun locala che la vischnaunca ha terminau. Era suenter quella revisiun stattan in tschuppel parcellas da baghegiar a disposiziun. «Gia duront la revisiun havein nus adina puspei giu damondas da cumprar terren da baghegiar.»

Claudio Simonet quenta ussa ch’ei detti novas activitads da baghegiar per prender dimora ella val. Ed ina caussa ha il president communal buca menziunau. A partir dall’entschatta digl onn stat il Pass Medelin a disposiziun alla populaziun indigena, in pass che sustegn finanzialmein diversas activitads sportivas, culturalas e dil traffic public per promover l’attractivitad dalla vischnaunca.

La vacca da latg

Che la vischnaunca Medel/Lucmagn ha in pei da taglia da sulet 70 % ei d’attribuir als aults tscheins dad aua che flessegian regularmein en cassa communala. Da quei fatg ei Claudio Simonet natiralmein pertscharts. El titulescha ils tscheins d’aua per la vacca da latg dalla Val Medel. Las entradas dils tscheins d’aua da Medel Lucmagn varieschan dad onn tier onn. En media setracta ei dad ina summa annuala da bia bein in milliun francs.

Ina gliesta detagliada davart ils cuosts da viver ellas vischnauncas svizras muossa che las vischnauncas da Mustér e Sumvitg porschan medemamein fetg favoreivlas cundiziuns finanzialas per famiglias. A prau cun duas vischnauncas Steinhausen e Risch el cantun Zug. En quellas duas vischnauncas ein ils tscheins casa per il dubel pli aults ch’ellas vischnauncas sursilvanas.

Ils cuosts dils aults tscheins vegnan denton ulivai da taglias bassas e favoreivlas premias per la casa da malsauns. Las premias dallas cassas da malsauns ei dependentas dallas diversas regiuns da premias e dallas restituziuns ch’ils singuls cantuns pagan. En general ha ils centers urbans cun bia miedis e biars survetschs medicinals pli aultas premias visavi alla campagna cun paucs miedis.