Dar in stausch al project La Mutta

«Cun quella orientaziun publica vulein nus animar e pussibilitar la discussiun culla populaziun», ha il president communal Norbert Good puntuau. Mesjamna sera ha el, ensemen cun consuprastonts, planisaders e partenaris dalla societad La Mutta SA, beneventau biebein 170 persunas ella sala dalla Fermata. El center ei il project da hotel La Mutta staus. Ei seigi buca in project finiu, ha Maurus Candreja, il commember dalla suprastonza communala, aschuntau, pertuccont la fuorma architectonica ed ils detagls seigi aunc memia baul d’informar.

Signals positivs dil Cantun

Ils profils dalla surbaghegiada turistica a Falera vegnan pia aunc buca tschentai. Aunc avon sto la basa dalla planisaziun esser lubida e garantida. Avon che la radunonza communala sappi prender il conclus leutier, astga la populaziun mirar ils plans e mintga persuna ha il dretg da cooperar e prender posiziun. Sco quei ch’il planisader Toni Broder dil biro Stauffer&Studach da Cuera ha declarau, han las instanzas cantunalas dau signals positivs d’ina emprema versiun ch’ellas han examinau. Medemamein il register funsil, aschia Toni Broder. Quel ei involvaus demai ch’il project dalla surbaghegiada turistica a Fandrels pretenda ina arrundaziun da funs. Per scaffir ina parcella adattada als basegns da circa 1,5 hectaras eis ei necessari ch’ils divers proprietaris da parcellas brattien ni scomien funs. Igl ei in scopo primar dalla procedura actuala.

Treis partenarias

Maurus Candreja e Norbert Good representan la vischnaunca da Falera el cussegl d’administraziun dalla societad La Mutta SA. La vischnaunca ei participada cun 34 % vid il capital d’aczias, las duas ulteriuras partenarias, la Blauhut SA e l’Arena Alva SA, han cumparts da mintgamai 33 %. Quellas vulan realisar in cumplex cun letgs ch’ein occupai gl’entir onn e cuntinuadamein.

Alla sera d’informaziun han Daniel Kündig e Reto Gurtner representau lur societads. Ferton che Reto Gurtner ha buca plidau, ha Daniel Kündig moderau la discussiun alla fin dall’informaziun. All’entschatta ha gerau Maurus Candreja denton menziunau ils motivs che intimeschan la vischnaunca da s’engaschar pils letgs caulds. Il cumplex planisau ei in cuntrast tier la gronda quantitad da letgs freids ch’ei dat a Falera.

«In motor dil svilup niev»

Biebein 80 % dil spazi da habitar a Falera ein habitaziuns secundaras. Ils proprietaris da quellas gaudan il ruaus, la survesta e la qualitad da viver a Falera – senza ch’els contribuessen ni promovessen in ulteriur svilup en lur domicil da vacanzas. La vischnaunca turistica ha tut interess da promover l’economia publica, pertgei daferton dat ei a Falera negin hotel pli e habitaziuns ed alloschis administrai mauncan.

«Il project La Mutta ei in motor d’in svilup niev», ha il gerau Maurus Candreja manegiau en vesta alla fasa actuala.  Alla fin dalla presentaziun ha Daniel Kündig menau ina discussiun pragmatica en sala. Ils responsabels al podi ha rispundiu biaras damondas, s’exprimi ein denton buca ils indigens da Falera, mobein persunas immigradas e hosps da vacanzas.

Promover stagiun da stad

Il sulet votum d’in indigen ha pertuccau l’occupaziun dils letgs caulds duront la stad. Tgi che garanteschi che las varga 130 habitaziuns seigien occupadas – e cunquei rentablas – naven da Pastgas tochen l’entschatta dalla stagiun d’unviern, ha el vuliu saver. Il president communal Norbert Good ha rispundiu aschia: «Nus duvrein effectivamein dapli frequenzas da stad, quei ei ina impurtonta finamira. Ed in tal project promova exact quei», ha el confirmau. Tenor l’informaziun da mesjamna sera savess la societad La Mutta SA inoltrar – cun investurs ch’ella sto aunc anflar – gl’onn proxim la damonda da baghegiar. El meglier cass savess il cumplex cun hotel e habitaziuns arver sias portas gl’onn 2030. Il resort includess era in sectur public cun survetschs, stizuns ed ustrias.