Üna mezza medaglia olimpica grischuna impü

Ses medaglias d’or, nouv medaglias d’argient ed och medaglias da bruonz. Auncha mê nun ho la Svizra pudieu guadagner dapü medaglias a gös olimpics d’inviern cu düraunt quistas ultimas duos eivnas a Milano Cortina.

Culla passlunghista Nadja Kälin (üna medaglia d’argient ed üna medaglia da bruonz), il skicrossist Alex Fiva (üna medaglia da bruonz) e la hockeyanra Leoni Balzer (üna medaglia da bruonz) suos-chan eir trais atletas ed atlets grischuns festager lur success cun üna medaglia olimpica.

Intaunt però procura eir la victoria da la medaglia d’argient tar la squedra da las curlistas svizras per almain üna mezza medaglia grischuna impü. Que grazcha a la giuvedra illa pusiziun dal «Lead», Selina Witschonke da Sempach i’l chantun Lucerna, oriunda però da Samedan. 

Culminaziun gös olimpics

Duos voutas vicechampiunessa mundiela e duos voutas champiunessa europeica. Que sun fin uossa stedas las victorias las pü grandas illa giuvna carriera da la curlista da 27 ans, Selina Witschonke. Ed uossa vain tiers üna medaglia olimpica. «Ad es ün fich bel sentimaint. Nus essans ourdvart cuntaintas cul resultat, eir scha a la fin finela nun ho que dal tuot bastieu per la medaglia d’or. Be già da pudair parteciper a gös olimpics es sto per me ün grand sömmi chi s’ho accumplieu e la medaglia d’argient la peja per tuot il sforz e las fadias dals ultims mais ed ans», refletta üna stracca, ma cuntainta Selina Witschonke al telefon, ün di zieva la sconfitta s-charsa da tschinch a ses i’l finel olimpic cunter la squedra svedaisa.

Cha guadagner üna medaglia olimpica – independentamaing da la culur – nu saja neir na qualchosa chi s’inclegia da se svess, agiundscha la curlista güsta in seguit. Impustüt scha’s resguarda cu cha l’eivna düraunt la qualificaziun es gireda cun bunas e main bunas partidas, ed alura il finel cun adversarias fich fermas. «Nus vains adüna stuvieu cumbatter, taunt düraunt la qualificaziun scu eir düraunt il finel. Pers nu vainsa perque cha nus vains giuvo mel, dimpersè perque cha nossas adversarias haun giuvo auncha quel miel pü bain cu nussas. E que es a la fin finela eir il bel da quist gö. Bel per tuot ils fans e bel pustüt eir per nos sport.» Ün sport ch’ella giouva già da pitschna sü ed ün, ch’ella ho cumanzo a giuver eir grazcha a l’Engiadina.

Engiadina, terra (da curling) fina

Naschida es Selina Witschonke a Samedan, creschida sü es ella però a Sempach i’l chantun Lucerna. Lo haun ella e sieu frer imprais a giuver a curling. Que da lur genituors chi sun gnieus in contact cul sport da curling düraunt ch’els abitaivan in Engiadin’Ota. Avaunt la naschentscha haun ils genituors nempe vivieu per duos ans a Segl e per set ans a La Punt-Chamues-ch. Uscheja es Selina Witschonke güsta doblamaing attacheda a l’Engiadina.

«L’Engiadina es per me aunch’adüna ün pô patria. Cun que cha mieus genituors possedan eir uossa auncha ün’abitaziun da vacanzas a La Punt, visitains nus minch’an l’Engiadina. Eau am giavüschess natürelmaing dad esser lo ün pô pü suvenz, ma culla carriera actuela nu’s lascha que displaschaivelmaing cumbiner adüna uschè bain.» Ella nun es attacheda però be cun l’Engiadina, dimpersè eir cun l’ulteriur Grischun: Selina Witschonke ho stüdgio management da sport illa scoul’ota professiunela a Cuira e sieu ami es medemmamaing da la chapitela grischuna.

Uschè cha taunt l’Engiadina, scu eir il Grischun tilla stettan fich a cour e cha perque as possa cun buna conscienzcha eir fer valair quista medaglia d’argient ün pô scu medaglia grischuna. 

Our d’idols dvanto collegas da squedra

La victoria da las curlistas svizras – eir scha la medaglia es a la fin dals quints d’argient – es üna victoria istorica. Ad es nempe pür la terza medaglia olimpica i’l sport dal curling da duonnas insomma per la Svizra e daspö 20 ans la prüma.

Cha que saja simplamaing üna granda furtüna ed onur per ella, disch Selina Witschonke. Taunt da pudair scriver ün pô istorgia, scu eir da pudair esser part da quista squedra daspö trais ans. Que cun curlistas chi d’eiran düraunt il temp da junioras auncha sieus idols ed uossa sias collegas da squedra. «Eau sun ourdvart grata. Quista squedra ho nempe pudieu guadagner divers titels eir già aunz mieu temp. Da lur experienza poss eau profiter natürelmaing üna pruna. Que eir perque cha la differenza d’eted es magari granda traunter da nus. Que es ün grand avantag per me.»

Ch’ün avantag saja que eir sto in vista als gös olimpics, cuntinuescha Selina Witschonke. Cha sias collegas da squedra tilla hegian adüna sustgnida e guideda düraunt quist temp per esser uschè bain prepareda scu pussibel. «Gös olimpics sun adüna qualchosa speciel per nus sportistas e sportists. Eau sun fich superbgia da nossa prestaziun, eir per que chi reguarda il sport da curling in generel. Mia spraunza es nempe cha cun nossa medaglia possans render attent a nos bel sport ad uschè bgeras persunas interessedas scu pussibel, impustüt a nossa giuventüna», conclüda la vicechampiunessa olimpica Selina Witschonke il discuors, avaunt cu chi ho nom per ella e per sia squedra: darcho inavous sül glatsch.

Prossem titel in mira

Chi chi craja nempe chi detta uossa ün pêr dis recreaziun o perfin vacanzas in Engiadina, quel s’ho sbaglio. Per ella e sia squedra vo que nempe güsta inavaunt e que da Cortina quasi directamaing a Berna. Lo haun actuelmaing lö las maestraunzas svizras da curling, inua cha las vandschedras as qualificheschan pels champiunedis mundiels da curling da duonnas chi haun alura lö uossa in marz a Calgary in Canada.

Uschè cha las vacanzas in Engiadina stöglian pel mumaint auncha spetter. Il pü gugent natürelmaing auncha fin zieva marz e scha pussibel cun ün’ulteriura medaglia da champiunedis mundiels impü intuorn culöz, per ella e per sia squedra, per la Svizra ed a la fin dals quints apunto eir ün miel pel Grischun e l’Engiadina.