Muments ed inspiraziuns

El ei in original, in dils paucs ch’ei dat aunc a Laax. Ch’el ei veramein in original ha Luis Coray cumprovau all’entschatta dall’occurrenza. El ha beneventau ils visitaders a sia moda, cun ina cuorta performance, ina sort sault cun tuns e suns ritmics en in lungatg fictiv. «Tipic Luis Coray», han ils visitaders patertgau e surris dalla cuorta producziun spontana. Aschia ha la sentupada cugl artist entschiet. Igl onn 2024 ha Casper Nicca realisau in film dad el per incumbensa dad RTR. Quei film da 25 minutas han ils visitaders mirau e seschau menar enamiez il mund da Luis Coray.

Ius tard ella pictura

Casper Nicca ha accumpignau gl’artist en differents loghens ch’ein stai decisivs per siu svilup. El film ves’ins denter auter scenas ch’el viandescha, equipaus cun cavalet e colurs, sil Monte Labbro ella Toscana. Casper Nicca ha registrau muments che Luis Coray lavura en ina cuntrada selvadia cun vent burasclus. Quell’aura brutta ha inspirau el. «Jeu vivel aunc adina da quels muments cheugiu», ha el tradiu el discuors ch’ei suandaus. En quella cuntrada dall’Italia era el seperfecziunaus ella pictura e cun Casper Nicca eis el returnaus els loghens.

Per Luis Coray sa in maletg esser in product d’in mument, enzatgei van e vargheivel. Il carstgaun creativ selai inspirar dalla natira, da sentiments e patratgs. Pli baul fageva el musica. El ei staus in dils emprems cantauturs sursilvans. Gl’um da 71 onns ei polivalents, el decuors dils onns ha la pictura survegniu la peisa gronda.

Gl’elefant ei ius a far bogn

En ina scena eis ella alla riva dalla mar e rasa ora ina gronda tenda malegiada. Ins vesa in elefant, ei seigi in semegliont sco quel ch’in artist hagi malegiau avon 700 onns sin ina dallas tablas sil plantschiu sura ella baselgia da s. Martin a Ziraun. Cun bugnar la teila ell’aua svaneschan la figura digl elefant. El mondi a far bogn ella mar, manegia gl’artist. Igl ei puspei ina da sias performances tipicas. Ins ha era viu gl’artist alla lavur en siu atelier a Cuera. Sco bab da famiglia ha el pli baul buca saviu seconcentrar sigl art, mobein ha luvrau en sia professiun da logoped. Pér pli tard ha el saviu suandar la vusch interna.

El discuors cun Erwin Ardüser ch’ei suandaus suenter la projecziun ha el manegiau:«Jeu stos star vid la colur». Casper Nicca ha integrau en siu film sequenzas cull tecnica veglia da super-8. Quei che po irritar enqualin, s’accorda culla moda da s’exprimer da Luis Coray. Ei para che dus artists secumpleteschien, in cineast, l’auter pictur.