Pippo Pollina ha fascinau
Sonda ei la sala dalla Fermata a Falera s’emplenida cun amaturs da Pippo Pollina. El ei enconuschents dapi biars onns sco cantautur poetic cun ina vusch caracteristica. A Falera ha el presentau canzuns da siu 25avel album «Fra guerra e pace».
Cun sia vusch, accumpignada dils differents instruments, ha el filosofau, da carstgauns ch’enqueran la pasch, da pintgas surpresas e pintgas miraclas. Il tetel dil concert ei staus «La vita è bella così com’è». Sonda vargada ei Pippo Pollina vegnius el Grischun puspei. Sper Cuera eis ei il sulet concert. «Jeu sun vegnius surprius si cheu a Falera da quella sala grondiusa. Enzatgei ch’jeu havess mai spitgau suenter il viadi siadora en tontas stortas»: Cun quei laud ha gl’artist beneventau siu publicum ella Fermata. Varga 300 persunas han vuliu tedlar el. Igl ei in publicum ch’enconuscha il musicist e sia musica. Pippo Pollina ei enconuschents pervia da sias canzuns che tematiseschan savens damondas entuorn pasch e giustia. Ellas retschas han ins viu glieud ch’ei ella media entuorn 55 onns.
In da bunamein 100 concerts
El sez ei vegnius 1985 en Svizra sco giuven musicant dalla via. 40 onns pli tard suna Pippo Pollina sin grondas tribunas ell’Europa. Actualmein cun in quartet acustic. Cécile Grüebler ei al violoncello, Elisa Sandrini al clavazin ed alla harmonica, Roberto Petroli suna ils instruments da stuors e lenn e Gionata Colaprisca dat la percussiun. Ier a Turitg, damaun a Roma, lu a Berna, Stuttgart, Berlin, Vienna, Bologna, Bellinzona, Minca, Innsbruck. En tut dat el bunamein 100 concerts cun duas differentas bands. Il concert da sonda a Falera ha gl’auditori gudiu cumpleinamein. Il messadi dil pacifist ha muentau, quei ha gl’applaus final mussau. Pippo Pollina ha sunau e cantau canzuns da siu album niev «Fra guerra e pace», igl ei il 25avel ch’el ha produciu dapi 1987.
Gust da leger dapli?