Bandunar la zona da cunfort

Cun egn rir an fatscha ad egn cordial bagnvagnieu antscheva par nus l’ura digl teater d’improvisaziùn. Silvia Sprecher e la manadra digl luvratori ad ella e durànt que project d’exerzezi – ca stat an conex cugl gioi liber «L’ovra electrica» – la surmestra da var diesch acturas ad acturs. Nign da nus â savieu s’imaginar, tge ca spetga egna measeanda sera davos igl esch da la stànza da sasida an la tgea da scola ad Andeer.

Activar la fantaseia cun giois

Igls organisaturs digl gioi liber «L’ovra electrica», ca vean preschanto questa stad, ân organiso tres seras – mintg’ea egn’ura amiez – cun Silvia Sprecher, par exerzitar teater d’improvisaziùn ad amprender ascheia da bandunar la zona da cunfort. Cun diferaints giois vut la manadra activar questa measeanda da favrer la nossa fantaseia. Pigl amprem exerzezi duvrainsa tres buras: egna bura verda par igls nums (la ple sempla leztga), egna melna par egn tema (sco par exaimpel verdira) a la bura cotschna par numnar plàntas. Las ideias par igls temas invanteschan igls partizipànts a las partizipàntas.

Par furtuna fan las buras adigna la madema veia, mo ear ascheia dat igl egn virivari legher. «Igl dat nigns sbagls agl teater d’improvisaziùn», dat Silvia Sprecher curascha a tutas a tuts. «Sch’anzatgi fa egn sbagl, salegrainsa tuts anzemel ca nus vagn amprieu anzatge», declara ella. L’antiera grupa acloma a motivescha igl partizipànt c’â sbaglieu. Ascheia resultescha egn’atmosfera legra a leava.

Szenas pintgas improvisadas

Suainter igl sascaldar antschavainsa da giujear szenas pintgas. «Piramidas» numna Silvia Sprecher quel exerzezi. L’amprema parsùna e sen la nossa tribuna imaginada a fa anzatge c’igl publicum dat avànt. Igl savund actur splatscha agls màns, ascheia c’i dat egn freeze. Ussa samida la situaziùn. Ascheia va quegl anavànt antocen ca la davosa parsùna aintra an la szena. Leza tgata egn motiv par svanir puspe, par exaimpel par ir ad earver igl esch. Egn actur suainter l’oter bandùna la tribuna puspe, antocen c’igl amprem e puspe sulet. Ascheia vagn nus peia savieu exerzitar ad experimantar – da rir â’gl do blear. Istorgias sco cuschinar malùns fatgs or da raviols da la berschla, la Heidi Klum ad igls sieus model near la Tgapetscha cotschna ad igl luf – tut quegl tanainsa andamaint cun egn rir.

Egna scola par la veta

Silvia Sprecher, la nossa manadra digl teater d’improvisaziùn, â schon d’unfànt giudieu da divertir la sia famiglia. Cun 20 ons e ella stada l’amprem’eada sen la tribuna cun l’uniùn da teater da la Tumleastga. «Da que tains nav’igl par perfecziùn da la rola, par beala raglia a titgira. Ear quegl plascheva a mei nunadieu», saragorda la manadra. Par ella e la faszinaziùn digl teater d’improvisaziùn c’igls acturs a las acturas ston s’ampatgear egn da l’oter, igl dat adigna szenas nunspitgeadas. «Igl teater d’improvisaziùn e par me egna bùna scola par la veta – tei vivas an que mumaint a fas igl miglier landeror», declara Silvia Sprecher.

Passa 15 ons â ella musso sco manadra a diferainta glieud co c’igl teater d’improvisaziùn funcziunescha. Blears ons â Silvia Sprecher luvro cun igls unfànts da la «Kinder- und Jugendbühne Domleschg», egna grupa da teater c’ella â fundo. La lavur cun unfànts a giuvenils segi adigna stada la sia preferida. Suainter la pandemeia da corona â la manadra savieu giuder la sia pensiùn.

Dar curascha

Ussa lavura Silvia Sprecher ànc, sch’ella a tains, par exaimpel par que project cun igls acturs digl gioi liber «L’ovra electrica». Par que teater a Balamburtg â l’expearta digl teater d’improvisaziùn ear s’anunztgeada, schagea ca ella â banduno la tribuna convenziunala. Ella gi da saseza c’ella segi betga egna bùna actura. Parquegl vean Silvia Sprecher ad easser trànter igls cantadurs digl teater, quegl ca fa surstar nus da la grupa d’improvisaziùn.

A tge ân igls acturs amaturs amprieu durànt las tres lecziùns tier Silvia Sprecher? Igls menis en sumagliànts: «Igls exerzezis ân gido da meter giou igl tgieu a semplameing giujear, sainza safar partratgs, sch’igl e dretg near falo», gi egn’actura da la Val Ragn. Ear oters gin c’igl workshop vegi do curascha da giujear a c’els sasaintan ussa ple sirs. Nus tuts nagn cun egn bùn santimaint a tgea a salegragn sen l’amprema prova digl teater, igls 11 d’avregl 2026.

Scha la glieud ad igl publicum da la tribuna libra a Balamburtg ancurschess lua gnànc, sch’egn actur amblida igl text ad improvisescha schi bagn – alura savainsa ca Silvia Sprecher â preparo bagn igls sieus sculars a las sias scularas.