La Tumleastga buglia d’art

L’otgavla ediziùn da l’exposiziùn cuminevla «Kostbar» e vagnida fatga uon sut igl tetel «An flussiùn». Quell’exposiziùn par art popular, c’â liac mintga dus ons, e vagnida iniztgeada da Gina Chiara a seat artistas d’Almen igls 2013. Uon e’la vagnida organisada da la cantadura Michelle DeFalque a l’ustiera Amanda Theiler. «Kostbar» e egn dubel gioi da pleds: Par l’egn fa’l andamaint egna «bar cun damagliear», a par l’otra de l’ocurenza easser «anzatge custevel». Quegl e’la propi ear puspe stada, dànd egna vasta survesta da la creaziùn d’art an la valada, mo ear purschànd egn program da rom cun musica, teater sen veia a teater da figuras, cun luvratoris a praulas par unfànts, mo surtut ear cun stgafir l’ovra d’art cuminevla an la baselgia refurmada. Quell’ovra d’art e vagnida inaugurada an dumeingia a caschùn digl survetsch divin salvo da sear Thomas Ruf. Ella vean a decorar igl plafùn da la baselgia pigl proxim taimp. Igls intermezos teatrals a musicals en mintgame vagnieus proclamos da «salters».

Egn’exposiziùn agl antier vitg

Mintga «Kostbar» e deditgeada ad egn tema spezific. Igl tema da quest on «An flussiùn» e naschieu egna sera cur ca la discussiùn agl ravugl digls organisaturs eara «fluainta». «El e egn prozess creativ c’â antschiet avànt egn on a miez», gi Michelle DeFalque, banavantànd egna grànda raspada d’interessos an vendargis sera an l’ustreia Landhus ad Almen.

Lur intenziùn d’exprimer la «flussiùn» vigni rapreschantada bagn da las passa 120 lavurs artisticas, lodan Michelle DeFalque ad Amanda Theiler a caschùn da l’avertura, vastgidas amaduas an vastgadira da pastgeadras, cunstatànd, ca las calurs blau a verd predomineschian an l’exposiziùn. Leza â gieu liac an diesch liacs: an la baselgia refurmada, la tgea da scola, an l’ustreia Landhus, an quaters clavos a tres truaschs. La premissa da dastgear exponer a la «Kostbar» e, ca las artistas ad artists ân d’avdar an la regiùn. Avànt egn on a miez igls ezs peia vagnieus infurmos davart igl tema da l’exposiziùn d’uon par inoltrar lur propostas seglsuainter. Quellas en alura vagnidas examinadas ad apruvadas d’egna giureia. 

Egn evenimaint c’â cuntanto tuts

Suainter igls sùns a tùns populars da la furmaziùn «Sagwerk» â’l prieu igl pled igl directur digl Turissem Viamala, Reto Thörig, par earver la mustra. «La veta an la regiùn Viamala e marcada digl Ragn Posteriur. Igl e que flem ca dat taimpra a veta a nossa regiùn, sco ear a l’exposiziùn», gi el vurdànd da pliras perspectivas sen la regiùn a ludànd sias qualitads ca vagnevian gea praztgeadas digls Romans a ple tard da poets sco Goethe a Nietzsche. Igl Ragn deti betga me inspiraziùn agls artists, mobagn segi ear simbol pigl lur spazi da viver, rapreschainti la veia digl comerzi, culeii carstgàns a culturas multifaras. – Peia gest aschi sco quell’exposiziùn c’e musso egna rimnada impressiunànta digl luvrar artistic. Ella â do veta a la vischnànca, â culieu ad atratg schoms da visitaders a visitadras durànt quels tres gis. Evidaint ca las duas organisaturas ân samusso satisfatgas la dumeingia sera. «Jou ve survagnieu blears resùns, c’igl segi sto la ple beala ‹Kostbar› an tut quels ons», cunfearma Michelle DeFalque. «Quell’exposiziùn e ear stada egna feasta pigls avdànts d’Almen c’ân stimo fetg, c’igl segi marscho anzatge agl vitg schiglioc ànz ruassevel. – Quell’ocurenza â musso, tge c’igl art po meter an movimaint.»