Secundindigens giavischan dapli informaziuns

La Cuminonza d’interess dallas possessurs e dils possessurs da secundas habitaziuns Tujetsch han fatg ina retscherca digitala tier sias commembras e ses commembers. Da quella sorta ch’ellas ed els giavischan negina fiasta da stad il mument en Val Tujetsch. Perencunter sevolvan els cun in giavisch alla vischnaunca da Tujetsch. La cuminonza giavischa numnadamein igl avegnir dapli informaziuns davart arranschaments previ, sco era davart la nova taglia d’objects ed igl augment dalla taxa da hosps.

Discurriu davart taglia e taxas

Culla taglia d’objects duein las sperditas che la vischnaunca ha entras las entradas dalla valur dall’atgna locaziun vegnir cuvretgas. Quella valur ha il pievel svizzer decidiu d’abolir. En quei senn ei la nova taglia d’objects pli u meins ina cumpensaziun d’ina expensa ch’exista gia. Pertuccont las taxas da hosps ein las vischnauncas da Tujetsch e Mustér dapresent lundervi da calcular igl alzament. Las taxas existentas ein vegnidas introducidas igl onn 2015 ed ein buca pli vegnidas adattadas dapi lu. Sco quei che la cuminonza scriva en ina communicaziun als mieds da massa, ha il president communal Martin Cavegn orientau alla radunonza generala davart la taglia d’objects ed igl augment dallas taxas da hosps. Simon Planzer, advocat e commember dalla suprastonza dalla cuminonza, ha informau davart las sfidas dalla taglia nova sco era davart igl agir ch’astga vegnir spitgaus en quei connex dil cantun Grischun. Las commembras ed ils commembers dalla cuminonza giavischan medemamein da promover la convivenza enteifer l’uniun, mo era culs indigens.

420 commembras e commembers

La Cuminonza d’interess dallas possessurs e dils possessurs da secundas habitaziuns Tujetsch dumbra il mument 420 commembras e commembers. Sco ils responsabels da quella scrivan ella communicaziun als mieds da massa, ei il diember da commembras e commembers carschius igl onn vargau per endisch pertschien. «Pli biars commembers che nus essan e pli bia forza che nus havein da representar nos interess tiels partenaris regiunals», di Priska Ziegler che presidiescha la cuminonza communablamein cun Roman Schmid. Sapientivamein ha la suprastonza dalla cuminonza fixau la radunonza da commembras e commembers quest onn sil temps da vacanzas els cantuns Zug e Turitg culla finamira da saver animar era glieud giuvna da separticipar e d’entrar ell’uniun. Dils 93 presents alla radunonza ils 13 da fevrer 2026 era denton la gronda part sils onns.