Tgi era Cadieli?

Vers la fin da favrer è vegnida la naiv. Quels dis ha la FMR publitgà (en La Quotidiana) in’enconuschenta poesia sursilvana: «Neiv e neiv! / Tut la pleiv / Ei da neiv curclada; / Gie perfin / Sin tgamin / Ei ‘la setschentada.» – I dat glieud che pretenda che la poesia «Unviern» da Gion Cadieli saja ina da las pli bellas poesias rumantschas insumma.

Quest onn vul Sagogn (il vitg nativ dal poet) commemorar l’anniversari da 150 onns da Sur Gion Cadieli (1876-1952). Però tgi era quest plevon catolic ed autur rumantsch insumma? En tschertga da respostas sun jau fruntà dacurt sin ina vegli’emissiun da «La marella» dad RTR dals 3 da november 2002. Avant 24 onns aveva Sagogn commemorà il 50avel di da la mort da ses vischin-poet. L’autura Maria Cadruvi era perquai ida en tschertga da fastizs da vita ed ovra da Gion Cadieli.

L’emissiun dal 2002 è ina grondiusa avischinaziun a quest poet ch’ha stgaffì ovras ch’èn anc oz enconuschentas, sco p.ex. la poesia «Unviern», ma era «Politica» (chantada d’Alexi e Marcus) u «La pura» (chantada da Corin Curschellas). Impressiunanta è la visita da Maria Cadruvi ad ina prova da chor a Sagogn, nua che divers chantadurs e chantaduras reciteschan cun grond anim singulas poesias da Cadieli.

En l’emissiun cun il titel «El era in original» vegnan er a pled experts da la litteratura rumantscha: Lothar Deplazes e Clà Riatsch. Quels descrivan dad ina vart las bravuras poeticas da Gion Cadieli, menziunan dentant era sias mendas litteraras. Ses maletg da las dunnas vegniss oz qualifitgà plitost sco problematic. – Tgi che less pia emprender d’enconuscher quest poet da Sagogn, quel u quella chatta «La marella: El era in original» cun 2-3 clics sin ils chanals dad RTR.