Funcziunaris da pleiv – specia rara

«Ina uniun san ins sligiar sch’ella ei danvonz, respectiv sch’ei vegn scart cun glieud e cugl interess per la caussa. Tier las pleivs va quei buca, ellas drovan vinavon persunas responsablas». Quella conclusiun trai Duri Coray dalla situaziun actuala. El ei president dalla pleiv catolica Rueun-Ruschein-Siat-Pigniu. Dacuort ha el, ensemen cun ses consuprastonts, drizzau in appel a parochianas e parochians. La pleiv cun ses biebein 600 commembers ei en ina situaziun fatala ed ella publicaziun numna el la raschun. Silla proxima radunonza generala ch’ei la fin d’avrel 2026 hagien treis funcziunaris demissiunau. El sez metta a disposiziun il presidi, plinavon gl’actuar e la cassiera. Els hagien en suprastonza ina buna entelgientscha, gliez seigi buca il motiv dallas demissiuns. Tuts treis seigien sedecidi da tschentar novas prioritads persunalas.

La pastoraziun buca il problem

Dapi igl 1. da schaner 2017 fuorman la cuminonzas da Rueun, Ruschein, Siat e Pigniu ina pleiv nova. Pervia dil sistem niev dall’ulivaziun da finanzas dalla Baselgia cantunala catolica ein ellas stadas sfurzadas da s’organisar da niev. Ei fuss stau previu d’integrar era la pleiv da Ladir en in project da fusiun, quella ei denton sedustada cun success encunter in sforz da surengiu. Ruschein ha la finala decidiu cun 14 encunter 13 vuschs da separticipar al project. Il mars 2016 havevan ils responsabels fatg allusiun, en in discuors culla FMR, ch’ei fussi ina finamira da collaborar culla pleiv da Glion, silmeins sin plaun pastoral. Lezza era vidlunder da consolidar la collaboraziun pastorala cun Sagogn, Schluein e Sevgein ed ha buca giu capacitads.

La finala han quater pleivs, Rueun, Ruschein, Siat e Pigniu, fixau in contract da fusiun ed il niev construct ei ius en vigur il schaner 2017. Cun sur Thomas Arkuszewski ha la pleiv era survegniu in plevon ch’ei responsabels pils vitgs e la pastoraziun dalla vart seniastra dil Rein. «La pastoraziun ei per nus buca il problem», dat Duri Coray d’entellir. El renda attent che la munconza da glieud els uffecis da pleiv seigi in problem general, era autras pleivs hagien breigias da recrutar glieud. Sco ellas uniuns ed ella politica communala ei l’indifferenza gronda era ellas pleivs. Glieud che ha unfriu biars onns pil cuminesser demissiunescha e negin s’empatscha da remplazzar ellas.

Evitar da vegnir sut curatella

Tgei scenari vesa Duri Coray sch’ei gartegiass buca d’anflar successuras ni successurs en sia pleiv? «En scadin cass vulein nus buca instradar puspei ina nova fusiun. Gliez ei negin tema», gi el. Duri Coray repeta che la pastoraziun seigi garantida cun sur Thomas, gliez seigi in fatg impurtont e legreivel. Zatgi stoppi denton tuttina, tenor la constituziun, administrar la pleiv. Aschia ch’ei detti nuot auter che d’anflar nova glieud. Sco quei ch’il president partent declara, ha gl’ugau dils baghetgs e schischoms en sia suprastonza buca demissiunau, el stetti a disposiziun per ina reelecziun. Sper quel drova la pleiv denton aunc treis persunas.

Per buca schar en perfetg sia pleiv e per evitar che quella vegn sut la curatella cantunala sestenta il president partent d’occupar ils uffecis. Il plevon ei numnadamein dependents d’in gremi directiv che porta il menaschi. L’administraziun dalla pleiv ei ina caussa, la pastoraziun tschella. Sur Thomas Arkuszewski ei in cumbattont singul e buca integraus en in team pastoral. El organisescha e meina persuls ils survetschs divins e la ductrina els quater vitgs. Plinavon survescha el alla pleiv da Ladir.

 In center pastoral regiunal?

Fuss ei buca d’engrau sche la pleiv Rueun-Ruschein-Siat-Pigniu secolligiass silmeins ella pastoraziun cun in center nua ch’il persunal sa sebrattar, esser en contact vicendeivel e parter lavur, quitaus e fastedis. Ella proxima vischinonza dat ei in tal center pastoral regiunal. Flurina Cavegn-Tomaschett ei teologa ed assistenta pastorala, ella meina il center dallas pleivs da Glion, Sagogn, Schluein e Sevgein. Tgei cussegl sa ella dar a Duri Coray? «Igl ei impurtont che talas pleivs contacteschan ad uras las persunas responsablas digl uestgiu», gi ella.

Flurina Cavegn-Tomaschett fa dil reminent part dalla cumissiun pastorala digl uestgiu. Sper il vicari general eis ella ina dallas persunas da contact. Sco ella tradescha ei gl’uestg vidlunder d’arver ina discussiun publica pertuccont centers regiunals. Apparentamein s’auda la pleiv Rueun-Ruschein-Siat-Pigniu a liunga vesta en in tal. Duri Coray sa era s’imaginar ina center pastoral regiunal. El puntuescha tuttina alla fin dil discuors: «Persunal per administrar facultads e beins immobigliars drova ei perquei tuttina».