Da dapli che mo dus destins

Èsi ina casualitad u ina decisiun? Sin in banc d’in parc sa scuntran dus umans. L’in è vegl, l’auter anc giuven, tuts dus paran d’esser sortids da l’ordinari. Plaun plaunet cumenzan els a sa quintar da lur vitas. Uschia turnan els puspè precautamain en lur vitas solitas, las vitas  da mintgadi… L’autura dal roman «Ich nannte ihn Kravatte» Milena Michiko Flašar dovra mo paucs pleds per dar vita a sias figuras, mo paucas scenas per quintar dad entirs destins – dals dus protagonists sezs, ma era dals destins da lur parents ed enconuschents. Tuts dus èn els umans a l’ur da la societad che han fadia cun la pressiun da stuair funcziunar e prestar. Quest banc sa chatta en il raquint en il Giapun, pudess dentant esser fitg bain er insanua auter en il mund dal vest. Jau As dun oz il tip da leger il roman da Milena Michiko Flašar che ha studegià a Vienna e Berlin germanistica e romanistica e che viva oz cun sia famiglia en la chapitala austriaca. Igl è in roman in zic melanconic che descriva cun ina fitg bella lingua dad ina vart la tema da crudar ord la norma e da l’autra il basegn da s’avrir per pudapir giudair la cumpagnia da l’autra persuna sin il banc en il parc…