«Dal tut realisà n’avain nus anc betg»
Suenter il cler NA a l’iniziativa SRG SSR è da sentir in grond levgiament en chasa RTR a Cuira. Per collavuraturas e collavuraturs fissi stà in tagl dramatic, sch’il budget da la SRG SSR fiss vegnì smesà. Grondas emoziuns n’èn entant betg stadas da vesair quel di en chasa. La FMR ha accumpagnà «il psicolog da la chasa» Valentin Schmed tras il di ed ha rimnà impressiuns ed emoziuns.
09.30 – In pau sco en ina biblioteca
In di da bell’aura a Cuira – en la «centrala» dad RTR en la Via da Masans 2 èsi ruassaivel, in pau sco en ina biblioteca. «I n’è betg da cumparegliar cun anc avant otg onns, cura ch’i gieva per ‹No Billag›. Lura avevan nus perfin medias internaziunalas en chasa ed insumma in grond travasch», di Tamara Deflorin che lavura en la direcziun dad RTR. Sin in grond monitur che penda vi dal palantschieu sura èn da vesair ils svelts e las sveltas dal Maraton da skis engiadinais. Per il nair dad in mez ski cun victorias grischunas.
09.45 – Cun chamischa blaua
Era Valentin Schmed (48), il manader da l’actualitad, è gia dapi in mument vi da ses pult entamez l’ala – uschè vegn numnà la gronda stanza da lavur dals blers redacturs e redacturas. L’um da Surrein en chamischa blaua è calm, e sco ch’el tradescha pli tard è quai er in pau stà ina fatschada: «Questa votaziun m’ha schon fatg rumpatesta inqual notg. La fin finala è RTR in super patrun, e perder quel faschess simplamain mal.» Oz ha el sper tegnair ensemen ils fils cun sustegn dals dus producents Prisca Bundi e Samuel Sossai entant anc in auter pensum.
09:50 – «Quel che dat aua a las flurs»
«Valentin Schmed è la mamma, il bab, il tat, la tatta, l’aug, l’onda e quel che dat aua a las flurs», di Flavio Bundi, schefredactur dad RTR cun in rir. El sesa gist visavi a Valentin Schmed ed è vi da glimar ils emprims pleds per in commentari tar las votaziuns. E sche Valentin Schmed dat propi er aua a las flurs, lura fa el ina lavur stupenta: las plantas èn in verdegiar. Quai è era bun per il clima.
09.55 – «I vegn schon bun»
Dad esser in pau «il psicolog da la chasa RTR» sco ch’el è vegnì numnà ina giada è necessari quel di. Tar in GEA a l’iniziativa vesessi ora mal per tut las collavuraturas e collavuraturs dal lieu da producziun Cuira. «Perquai pudessi er esser ch’in u l’auter ha oz in pau auts e bass, cunzunt sch’i giess en direcziun GEA. «Las 12.00 vegn l’emprim trend, ma jau sper ch’i vegnia schon bun», di Valentin Schmed si per sasez.
10.00 – Lavur sco adina
«Oz è in di spezial.» – Cun quests pleds beneventa Flavio Bundi sia squadra da la dumengia che sa cumpona da radund 40 collavuraturas e collavuraturs. Quels mainan tras il di dad oz, fan novitads, modereschan, analiseschan, commenteschan, filmeschan ed uschia vinavant. Er il directur Nicolas Pernet è sa chapescha da la partida. Flavio Bundi engrazia: «Nus faschain la lavur sco adina, i va gea er anc per autras votaziuns che quella da la SRG SSR. Grazia fitg per vus tuts per la lavur dals davos mais.»
10.15 – «Jau hai relativamain bunas ureglias»
«Ussa stuain nus simplamain spetgar enfin ch’ils emprims resultats èn ora.» Valentin Schmed fa entant ina runda tar las differentas partiziuns en chasa RTR, tar ils «onliners», tar quels da «Telesguard», tar il radio, gea ed era si en cafetaria nua che las bunas olmas semtgan il gentar per la squadra. «Qua vesi gea ora sco tar in gentar per ina nozza», fa el in spruh, faschond allusiun a la decoraziun cun flurs e vasas. «Jau enconusch schon daditg la glieud ed hai relativamain bunas ureglias ed aud bler e sent co ch’il puls è.»
10.45 – Objectiv, malgrà consequenzas dramaticas
Valentin Schmed agiunta:«Igl è da star enavos cun l’atgna opiniun. Nus stuain star objectivs ed equilibrads, quai è noss job, era sche nossas plazzas èn periclitadas.»
11.15 – «Betg blera pazienza a chasa»
En l’ala èsi vinavant anc ruassaivel, i vegn mo murmurà qua e là dà en las tastas. Valentin Schmed – el sez è gia dapi 22 onns tar RTR – enconuscha ordador il proceder dad ina dumengia da votaziun: «Quai è schon mia 80avla circa, bler è damai era ‹courant normal›.» A la svelta organisescha el anc ina plazza da lavur e dat ina baterlada cun ils producents. «Jau sun disà da far quai. Ma ier sonda per exempel hai jau sentì che jau na poss betg propi vertir bler. Insumma ils davos dis sun jau stà fitg focussà sin RTR e n’aveva forsa betg adina uschè blera pazienza a chasa.»
11.40 – Emprims resultats grischuns
La tensiun crescha. Prest avessan ils resultats intermediars da las vischnancas grischunas da vegnir en per e-mail. Er il directur Nicolas Pernet observa uss ils resultats sper il pult da Valentin Schmed. A las 11.45 vegn enconuschent: 71 da 100 vischnancas han votà, tendenza NA. Nicolas Pernet dumonda: «Tge pensas, vai forsa plinengiu, sche Cuira è schon dumbrà ora u betg?» La replica dal manader da l’actualitad: «Jau na vuless anc betg far prognosas.» Dal rest: Naginas buttiglias da schampagn na vegnan avertas.
12.20 – Spaghettada cun televisiun
En cafetaria da la chasa RTR è in smugl glieud. Temp da gentar, bun appetit! Insatgi auter prenda in chaz spaghettis sin ses taglier. In auter lascha gia ora il café e guarda cun plaschair sin las bunas pettas. Suenter ch’igl è cler ch’il Grischun votescha NA a l’iniziativa SRG SSR ed er ils signals en Svizra van envers in cler NA, va la televisiun. Il politicher Martin Candinas è cuntent che l’iniziativa para da vegnir refusada – cler. Pli tard tegna Susanne Wille, la directura da la SRG in pled via livestream: «Ussa dastgain nus suspirar.»
14.00 – «Nus avain da funcziunar»
Valentin Schmed fa ina segunda runda en chasa tar las schurnalistas e schurnalists. Igl è adina anc ruassaivel, il mulin para dad ir, mintgin ha da far sia lavur vinavant. «Dal tut realisà n’avain nus anc betg che l’iniziativa è vegnida refusada. Ussa lavurain nus anc, e pir questa saira vegn lura probabel il grond levgiament.»
15.06 – «Levgiads»
Pli allegra è la luna damai gia uss en la cafetaria. Ils commembers da l’uniun purtadra SRG SSR Gion Lechmann, Elena Luzio, Vincent Augustin, Patric Collet e Sandra Carisch sesan enturn la maisa decorada cun ina tulipana melna. «Nus essan levgiads», ha ditg il president da la SRG SSR Vincent Augustin.
16.30 – «Uss avess jau gugent in magiel vin»
Levgià è era Valentin Schmed. Il «luft» è ora, ed i fa brin plaunsieu. «Uss avess jau gugent in magiel vin, dapli betg. Plaunsieu realisesch jau tge che quai munta e sun stanchel», di Valentin Schmed. Suenter il «maraton» cun las grondas preparaziuns e tensiuns en chasa RTR tuna el in pau sco ils passlunghists da tschel maraton. E tgisà, forsa dat el uss aua a las flurs.
Gust da leger dapli?