Tras il tunnel da nouv per duos francs daplü

Fin uossa cuostaiva il viadi tras il tunnel dal Vereina cul tren d’autos dürant la stagiun d’inviern 39 francs e dürant la stagiun da stà 34 francs – quai per autos cun ün pais fin 3,5 tonnas. A partir dals 1. mai 2026 ha la Viafier retica uossa annunzchà ün augmaint integral dals predschs da duos francs. Tant pro las tariffas normalas sco eir pro quellas redottas per indigens e pels giasts d’hotels o d’abitaziuns da vacanzas.

Investiziuns ed incharimaint

Ils bigliets chi’s po retrar pro’l cumün cuostan da nouv 28 francs dürant tuot on, quels regulars dürant la stà 36 francs e dürant l’inviern 41 francs. In üna charta als cumüns ed a las organisaziuns da turissem scriva la Viafier retica cha l’augmaint saja necessari eir perquai cha i’ls prossems ons saran necessarias «investiziuns considerablas in sgürezza, punctualità ed impustüt per l’acquist da nouvs vaguns».

Inavant fa la Viafier retica attent a l’incharimaint daspö l’ultim augmaint da las tariffas l’on 2016. Tenor l’index naziunal dals predschs da consüm cha l’Uffizi federal da statistica calculescha, importa l’inflaziun daspö quella jada 7,9 %. Ils bigliets pel transport tras il tunnel dal Vereina vegnan uossa tanter 7,7 % (tariffa da rabat per indigens) e 5,1 % (tariffa regulara d’inviern) plü chars.  

Acceptà da Chantun e Confederaziun

L’augmaint da las tariffas saja gnü decis cun l’acconsentimaint dal Chantun e da la Confederaziun, fa a savair la Viafier retica. Il transport d’autos tras il tunnel nu vain subvenziunà dal man public ed as sto portar finanzialmaing svess.

I’ls ultims ons ha la Viafier retica pudü comunichar in mincha rapport da gestiun nouvas cifras da record. Tenor quel da l’on 2024 – intant il plü actual – sajan rollats 560 415 veiculs dal Partens in Engiadina e suotsura tras il tunnel – 5 % daplü co l’on avant. Tenor quel rapport esa actualmaing eir in planisaziun d’ingrondir la staziun a Selfranga, da renovar las installaziuns electricas e da megliorar la sgürezza i’l tunnel cun üna ventilaziun.

Cumpromiss cul controllör dals predschs

In quista situaziun constatescha eir il controllör federal dals predschs, Stefan Meierhans, in sia newsletter dals 20 favrer 2026, cha la necessità d’ün augmaint dals predschs saja inclegiantaivla. Culla Viafier retica ha’l però stipulà cha fin la prüma­vaira 2030 desista quella dad ulteriurs augmaints pro la tariffa d’inviern ed implü eir ün rabat dad 1.50 francs pro la tariffa d’inviern, schi’s posta il bigliet online. Lura cuosta quel bigliet 39.50 francs impè da 41 francs.

Però intant nu füssa inamöd na pussibel da profitar da quel rabat, perquai cha’l webshop da ­bigliets pel tren d’autos es daspö ün’attacha da ­cyber in schner 2026 our d’funcziun. La Viafier retica fa quint cha quel possa i’ls prossems dis darcheu gnir tut in funcziun, intant cha quel rabat va insomma pür in vigur a partir da la prosma ­stagiun d’inviern.