Da Flurs Solèr tier Flurs da cor

Quei che ha entschiet avon 34 onns sco fatschenta da flurs ei daventau lur veta: in liug da s’entupada, dil plascher, dallas colurs e da biaras pintgas e grondas emoziuns ch’ein vegnidas accumpignadas da flurs. Quei scrivan Prisca e Primus Solèr, ils possessurs partents da Flurs Solèr sco cumiau sin lur pagina d’internet. Els seigien ventireivels da saver surdar naven da venderdis proxim lur fatschenta en mauns giuvens, alla flurista indigena Leonie Candinas.

Nota persunala impurtonta

La stizun da Flurs Solèr ei serrada. Las davosas jamnas eis ei vegniu rumiu mobiglias, schubergiau ed endrizzau da niev. La nova patruna Leonie Candinas di ch’ina part dalla stizun vegni endrizzada pressapauc sco pli baul ed ina part vegni empau autra cun in niev stil. Cunquei detti ella sia nota persunala alla fatschenta che senumna da niev Flurs da cor. La fatschenta da flurs ei dapi igl onn 1995 alla Via Lucmagn 2 a Mustér. Ella schai en in liug central che vegn percepius dils indigens e dils hosps da vacanzas. En quei liug ha Leonie Candinas acquistau ils onns 2022 – 2025 sia savida en tuttas spartas dalla lavur cun flurs per tuttas occasiuns. En quei temps ha ella era gudignau duas gadas la medaglia d’argien ella enconuschenta concurrenza «Zürcher Blumen-Medaille».

En l’Irlanda

Suenter igl emprendissadi ha la nova menadra dalla stizun da flurs a Mustér luvrau quater meins sco flurista a Dublin en l’Irlanda. «Per mei ei quei stau ina fetg buna experientscha da veser co la branscha da commerci cun flurs funcziunescha en in’autra tiara. Jeu haiel era viu ch’ei dat aunc auters process da lavur. Bia funcziunescha tuttina e bia ei auter.» Prisca Solèr ch’ei era flurista diplomada di ch’il nivo da qualitad e dallas prestaziuns da survetsch ellas stizuns da flurs en Svizra seigi en general fetg aults. Ed il medem vali era per exempel per la scolaziun da meister flurist.

Igl ei stau bi

Primus e Prisca Solèr han surdau il tgamun da lur fatschenta. Egl avegnir vegnan els aunc a star a disposiziun sco gidonters da Leonie Candinas e da sia mumma Erika Candinas che fa era part dil niev team. La lavur cul cor ei e resta il center dalla stizun. Prisca Solèr di ch’ella e siu um Primus sco hortulan e flurist hagien luvrau cun cor ed olma tut ils 34 onns da fatschenta. Primus Solèr ch’ei carschius si a Cumbel en Val Lumnezia di ch’el hagi gia sco affon adina giu il giavisch da daventar flurist. «Alla fin finala eis ei vegniu cussegliau a mi d’emprender da hortulan per haver ina existenza pli vasta pli tard.»

La dretga decisiun

«Jeu sun carschida si en in hotel a Breil ed haiel sco giuvna adina detg ch’jeu vegli mai haver sezza ina fatschenta», seregorda Prisca Solèr. E tuttenina seigi siu um Primus vegnius in di e detg ch’el vulessi arver ina stizun da flurs. «Malgrad miu propiest da mai vuler haver ina fatschenta hai jeu susteniu siu siemi. Sia pissiun per quella bellezia clamada creativa, sia pissiun per fluras, colurs e fuormas ha era tschaffau mei. Igl ei stau la dretga decisiun, pertgei nus havein cumpletau fetg bein in l’auter en fatschenta sco era privat.» La clientella d’indigens ed jasters hagi remunerau quei cun cumpras da flurs ni era cun incumbensas da nozzas ni da flurs per fossas ed autras occasiun, dian Prisca e Primus Solèr.

Cun cor ed olma

«Nossa successura Leonie Candinas ha empriu e rimnau biaras experientschas tier nus», dian Prisca e Primus Solèr. «Ed ussa va ella sia via sco dunna da fatschenta.» La nova patruna Leonie Candinas di ch’ella vegni era a s’engaschar cun cor ed olma per sias clientiella. «Quei vegn appreziau fetg ed ei ina plivalur d’ina stizun dil vitg.» Venderdis, ils 13 da mars 2026 arva Leonie Candinas sia stizun Flurs da cor a Mustér.

Surdada simbolica dil cor da flurs dils anteriurs alla nova menadra dalla stizun da flurs a Mustér (da sen.): Primus e Prisca Solèr, Leonie ed Erika Candinas. Fotos Martin Gabriel