Da Sent a Honolulu

Autentic e persunal. Quai nu sun be valurs importantas illa cussagliaziun da Martina Vital, schi va per tscherner las prosmas vacanzas per sia cliantella. Autentic e persunal, uschea as pudessa eir descriver seis nouv büro da viadis in ün’anteriura località d’üna bacharia a Sent. «Eu cugnuschaiva quist localin amo da plü bod cun paquettar charn. Suvent suna quia passada speravia contemplond la vaidrina sper la via e pensond cha quist local vess simplamaing la grondezza ideala per ün pitschen büro da viadis», raquinta Martina Vital tuot superba da seis nouv lö da cussagliaziun.

La vaidrina, quella es intant gnüda implida. Quai cun differentas reclomas ed offertas, ed ün muossavia fat a man ed indichond destinaziuns da vacanzas sco Paris, Tokio e Honolulu. Ed eir dadaintvart invida il nouv local – decorà tanter oter cun üna lampa dal Maroc, ün tapet chi d’eira üna vouta ün sach da pavel per chamels e duos statuas da lain da l’Africa dal Süd – da s’insömgiar da pajais lontans e schi va bain, da sias prosmas vacanzas. Tuot es gnü renovà svessa cun bler’amur pel detagl e cun l’agüd da seis hom.

Daplü co be ün manster

Cusgliar viadis, quai es adüna fingià statta la gronda paschiun da la duonna da 46 ons oriunda da Hinwil. Fat il giarsunadi da commerzi in ün büro da viadis dal 1999 a Turich, ha Martina Vital lavurà davopro e fin avant ch’ella es rivada in Engiadina sainza interrupziuns adüna i’l sectur da viadis. Ch’impustüt il contact culla cliantella tilla fascinescha eir hoz amo adüna precis listess, cuntinuescha Martina Vital il discuors. «I’s sto avair üna fich gronda paschiun per quista lavur. Gnir richa nempe, quai nu’s vegna brichafat na in quista professiun.»

Dal 2011 tilla ha manada lura l’amur da la Bassa a Sent ill’Engiadina. Sia paschiun pella cussagliaziun da viadis nun ha ella però mai pers. Sper otras occupaziuns dürant ils ultims ons ha Martina Vital nempe adüna eir sport cussagliaziuns in ün rom fich redot – e plütöst sco hobi – davent da chasa. Quai sco collavuratura libra d’ün büro da viadis illa Bassa. Ed uossa daspö la mità da schner da quist on nu sto sia cliantella plü ir pro ella a chasa o ella pro sia cliantella. Insembel culla interpraisa ch’ella ha collavurà dürant ils ultims ons, ha Martina Vital nempe bandunà seis manster actual e s’accumpli seis sömmi.

Daplü co be postar vacanzas

«Eu n’ha adüna fingià giavüschà d’avair ün agen büro ed eir pensà cha quai haja potenzial. Impustüt davo cha’l büro da viadis a Scuol vaiva serrà sias portas avant ün pêr ons. Ed uossa n’haja chattà quia a Sent, ingio ch’eu sun eir da chasa, precis quai ch’eu tscherchaiva. Nempe ün pitschen lö pajabel e prüvà per pudair far precis quai chi’m stà a cour: cussagliaziuns da viadis autenticas e persunalas.»

Chi nu detta nüglia chi rimplazza üna cussagliaziun persunala, schi’s tratta da tscherner sias prosmas vacanzas, es Martina Vital persvasa. Impustüt na in temps da booking.com, ebookers ed intelligenza artificiala. «La gronda differenza es, cha no eschan quia per nossa cliantella e quai na be avant co ir in vacanzas, dimpersè eir dürant las vacanzas. Ün tal servezzan e sustegn persunal sun unicamaing büros da viadis buns da spordscher.»

E sco chi para, han las fadias dad esser finalmaing preschainta cun ün büro valü la paina. Martina Vital es nempe fich cuntainta dal rebomb fin uossa, eir scha’ls Engiadinais nu sun güsta cuntschaints dad esser ün pövel chi viagia propcha suvent e dalöntsch davent. «In congual culs da la Bassa as laschan ils Engiadinais plütöst captivar da viadis bain organisats e forsa main exotics. Pel mumaint fich in moda, almain pro persunas plütöst plü attempadas, sun viadis in barcha sül flüm», constatescha Martina Vital ün zich riond dad üna vart ed ün zich preoccupada da tschella vart, quai in vista als conflicts actuals sül muond. «La guerra i’l Iran e l’effet sün oters pajais vaschins, quai es üna gronda malsgürezza. Dürant las vacanzas in mai tuot chi vuless ir inglur al chod, destinaziuns i’l prossem oriaint sun perquai fich dumandadas.»

Daplü co be ün büro da viadis

Cha la branscha da viadis saja però adüna fingià statta fich resistenta invers crisas. Chi saja simplamaing dad esser ün zich creativ e tscherchar in man da Dieu alternativas. Forsa ün’alternativa sco quista? «Ultimamaing n’haja surgni üna visita fich simpatica d’ün hom da Sent plü attempà. El es stat üna lunga pezza davant la vaidrina ed es lura entrà pro mai in büro e dit: ‹Allegra, eu gess gugent üna jada a Honolulu!›.» Cha fin a Honolulu nun es l’hom a la fin dals quints lura listess na viagià, però sorti davopro cuntaint d’avair pudü dar üna pitschna baderlada. E precis tals inscunters tilla rendan fich cuntainta, conclüda Martina Vital il discuors dond ün sguard inavant.

«Quist nu dess be esser ün büro da viadis, dimpersè eir ün lö d’inscunter. Eu n’ha fingià millis ideas co chi’s pudess nüzziar quistas localitats eir otramaing. In avegnir lessa quia realisar nempe pitschnas occurrenzas sco degustaziuns da vin per preschantar ün o l’oter pajais o spordscher ün lö da creatività cun cuors da cusir obain cun cuors da fuormar ardschiglia.» Dad ideas dimena nu manca ed ün slogan vess Martina Vital eir fingià pront. Impè da «Reisebüro und Meer» pudess seis büro gnir lura titulà «Reisebüro und Mehr».