«In cler votum per il Lido»

Il Lido al Heidsee è cunzunt la stad in lieu popular e bain frequentà. L’infrastructura è dentant vegnida en ils onns e basegna d’ina renovaziun. Quai aveva la vischnanca Vaz scrit en il messadi pertutgant la votaziun a l’urna da dumengia. Il suveran ha stuì decider davart in credit d’impegn da 5,6 milliuns francs per realisar in nov Lido – ed ha ditg GEA. La suletta fatschenta communala a Vaz è vegnida approvada cun 712 cunter 378 vuschs, ubain cun 65,3 %.

Tenor Maurin Malär, il president communal, è quai in bun resultat, malgrà che radund in terz da las votantas e votants ha refusà la fatschenta: «Jau sun fitg cuntent cun quest resultat. Igl è in cler votum per il Lido ed impurtant ch’ins possia realisar in stabiliment modern e confurm als basegns.» Ch’i dettia era cuntravuschs, quai saja entant normal ed era bun. I mussia che la democrazia funcziunescha.

Parallel cun la sanaziun dal rempar

Cura ch’il nov Lido vegn realisà, quai n’è entant anc betg cler. Sco che Maurin Malär ha confermà envers la FMR, saja la finamira vinavant da construir quel ensemen cun la sanaziun dal rempar dal Heidsee: «Idealmain faschain nus quai parallelamain, uschia ch’igl è be in plazzal per dus gronds projects. Actualmain na savain nus dentant betg, cura che nus survegnin glisch verda per las lavurs vi dal rempar.»

La sanaziun dal rempar sa retardescha numnadamain, cunquai che la vischnanca spetga anc in’approvaziun da l’Uffizi federal d’energia. Quel aveva publitgà l’onn passà novas directivas areguard la segirezza en cas da terratrembels e la sanaziun dal rempar dal Heidsee ha perquai stuì vegnir examinada pli en detagl. «Igl è actualmain anc avert cura che nus pudain cumenzar cun las lavurs», ha il president communal fatg a savair. Cler saja dentant ch’ins na cumenza betg quest onn.