In telefon

Sin tribuna: In birocrat cun in telefon.

(Riiiinnggg)

«Bien di, cheu ei signur Rigidius dil Departament federal da malproporziunalitad ed igl augment da birocrazia. Gie, bien che Vus telefoneis a nus, aschia saveis Vus surprender ils cuosts per il telefonat. Giebein. Nus vein intervegniu che Vus sappies sco Romontsch buca mussar si Vossas enconuschientschas da tudestg svizzer. Vus stueis far in test.

Aha, Vus veis discurriu tudestg svizzer a casa, sper il romontsch? Na, quei tonscha buc sco mussament … Na, lu savess mintgin vegnir cheu e tschintschar in tec da quei oberländerdialekt e pretender ch’el sappi.

Mo, mo … Aschi ditg discurris schon dialect e mai zatgi che ha dumandau, sche Vus seigies Svizzer? Na, ussa vein nus introduciu quei test, ed ei dat buc in’autra pusseivladad da mussar si Vossas enconuschientschas che cun quei test. Gie, jeu audel che Vus capis e discurris tiptop, mo Vus stueis era saver leger e scriver.

Aha, Vus veis scret sms e schizun brevs d’amur per dialect? Na, gnanc Vos texts pli liungs valan sco mussament. Saveis, ozildi cun IA … tgei texts vegls … Quei sa mintgin pretender!

Mo, mo … Vus tedleis adina «Schnabelweid» el radio? Na, sche Vus leis vinavon far diever dil dialect svizzer sco entochen dacheu, stueis far quei test.Aha, mo, mo … Na, online va buc, Vus essas sez la cuolpa, sche Vus steis ella pampa. Il liug da tests ei lunsch naven da nua che Vus steis, il test cuoza uras e sch’ei tonscha buca dad esser ad uras la damaun ni la sera a casa, stueis halt aunc pagar in hotel.

Aha, so, so! Na, malproporziunai ei mo che Vus veis tertgau che Vus sappies il lungatg suenter tons onns e diever! Tgi che ha buc in diplom …

So, so! Na, sauna raschun vala nuot tier nus, mo diploms e daners bluts. Giebein, quei test cuosta buca pauc, aber il sistem sto era surviver. Na, better ella tualetta ils daners fa buca pli bia senn – cun quei test survegnis in bi diplom che Vus saveis pender vid la preit en stiva, e nus savein far nies X el quader giudem seniester el program da …

So! Na, savida senza diplom ha buca plaz els quaders dalla birocrazia. Il sistem ei buca fatgs per carstgauns, mobein …

Co? Suflar nua? Hallo …?

Anna-Luisa Joël creschida si (biling) en il Danemarc e viva dapi plirs onns en la Rumantschia. Il text è inspirà mo levamain d’experientschas actualas cun la birocrazia svizra.