«Ina caschun speciala ed emoziunala»

Sonda, ils 28 da fevrer 2026 ein ils frars René (59) ed Andi Schnoz (55) sepresentai sin tribuna ella halla Cons a Mustér. Il motiv: Lur program cul num «En 80 minutas entuorn il mund – mo senza mei». En quel muossa René Schnoz 290 fotos da varga 100 tiaras. Igl ein fotos fatgas ils davos rodund 25 onns. En quella revista da fotos vegn el accumpignaus da siu frar Andi alla ghitara electrica. Il tetel dalla revista ei negin’invenziun speciala: Ferton che René nezegia scadina minuta da siu temps liber per viagiar pil mund entuorn, appreziescha Andi da far musica e passentar sias vacanzas al lag da Neuchâtel. Sco tier la professiun sespartan ils interess dils dus frars era tiels hobis. Las fotografias che René Schnoz muossa en quella turnea ein dil reminent ina selecziun da rodund 60 000 maletgs ch’el ha fatg ils davos onns cun camera e drona. Igl ei maletgs fascinonts da cuntradas, auas, animals e glieud che dattan ina grondiusa impressiun dalla varietad sin quest mund.

«Regurdientschas da pli baul»

Sco la revista da fotos sco tala ei era la sera en halla Cons a Mustér stada particulara per René ed Andi Schnoz. Els sepresentan buca stedi communablamein sin tribuna ed en lur vitg nativ ei quei schizun stau l’emprema ga. «Quei ei secapescha stau in mument special ed emoziunal. Jeu hai viu bia glieud ch’jeu havevel daditg buca pli viu. Tut quei ei stau cumbinau cun biaras regurdientschas. E lu eis ei naturalmein bi da veser cheu era nies bab (Christian) – nies pli grond fan – ellas retschas dallas aspectaturas e dils aspectaturs», di René Schnoz. Resentiments hagi ei denton era dau pertuccont la halla Cons e la casa da scola gest dasperas: «Cheu fagevan nus gimnastica e miravan films da Winnetou.» Buc auter ei quei stau per Andi Schnoz: «Jeu hai gudiu la sera. Igl ei iu bia atras il tgau e bein enqual persuna ch’jeu hai viu quella sera vai jeu stuiu studegiar duas ga nua metter a casa.»

La ghitara rispunda

Avon rodund 20 onns ein els sepresentai sin tribuna communablamein cul toc «Tagebuch eines Wahnsinnigen». Ferton che René ha giugau en gliez toc la rolla digl actur, ei Andi seschluitaus en ina figura metta che rispundeva culs tuns da sia ghitara. Empau semegliont eis ei stau la sonda sera en halla Cons. Schebein els dus sepresentan era suenter quella turnea cun auters programs communablamein sin tribuna ei tut auter che cert: «Nus tscherchein adina puspei caschuns da cooperar. Igl ei denton aschia ch’jeu enquerel en quei connex il contact cun miu frar e buc il cuntrari. Dapi onns ditg jeu ad el ch’el astgi era dumandar mei ina ga per in engaschament communabel», relata René Schnoz cun bucca rienta.

Musica ei sia professiun

Andi Schnoz ei buca mo musicist cura ch’el ei sin tribuna: «La musica ei mia professiun. Jeu sun scolast da musica e sunel en differentas formaziuns.» Siu instrument preferiu ei la ghitara electrica. Savens eis el d’udir en concerts da jazz. «Il mument sun jeu involvius ellas preparativas pil giubileum da 20 onns dils Kanti-S-Wings cun quater concerts igl avrel e matg a Cuera», di il musicist passiunau. Sco siu frar René eis era el involvius el teater el liber «1799 – Revolta ella Cadi» da questa stad a Mustér. Per quel fa el registraziuns da musica. Sis onns ei Andi Schnoz era staus engaschaus politicamein el cussegl dil marcau da Cuera. Da quella funcziun eis el seretratgs la fin digl onn vargau.

Digl actur al regissur

René Schnoz ei staus da veser savens sco actur sin tribuna da teater ni alla televisiun. Ils davos onns eis el denton sededicaus pli e pli alla funcziun da regissur. En quella rolla prepara el era il mument il teater el liber igl uost vegnent a Mustér. Las preparativas persuenter marschan e parallelamein ei René Schnoz aunc engaschaus vid plirs auters projects. Il venderdis vargau ha giu liug la premiera dil toc «Ängel uf Abwäge» ad Eglisau, in toc ch’el meina medemamein reschia. «En quella funcziun eis ei semussau ina ga dapli con che sto constar per ch’in toc sappi vegnir daus. Ina da nossas acturas principalas ei stada bloccada a Dubai pervia dall’uiara ed aschia eis ei restau nuot auter che da tschercar sur notg ina reserva per che nus seigien semtgai silla premiera», raquenta René Schnoz. In ulteriur project sin rucca ei in monolog ch’el inscenescha e gioga sez, accumpignaus cun musica da Rolf Caflisch. Igl ei il monolog d’ina persuna che ha da proteger in maletg en in museum.