La Regenza insista da colonisar dus lufs-tscherver
La Regenza insista sin la colonisaziun da dus lufs-tscherver en Surselva. Sco ch’ella scriva en sia resposta sin in’incumbensa dal deputà Gian Derungs, saja quella colonisaziun da chapir sco mesira da cumpensaziun.
Il december passà ha il deputà Gian Derungs (Partida dal Center) inoltrà a la Regenza in’incumbensa concernent in stop da colonisar animals da rapina gronds en il Grischun. El è sa basà sin in’infurmaziun dal chantun Grischun che la Confederaziun haja permess da colonisar dus lufs-tscherver. L’Uffizi da chatscha e pestga dal Grischun aveva inoltrà la dumonda respectiva. Sco lieu è previs il cumpartiment da lufs-tscherver Surselva. En si’incumbensa pretenda Gian Derungs da la Regenza da desister da colonisar ils dus lufs-tscherver. Plinavant duain era vegnir interruttas tut las activitads da preparaziun e da realisaziun correspundentas fin che questa incumbensa è vegnida tractada.
Lufs-tscherver duain vegnir colonisads
La colonisaziun da dus lufs-tscherver, ch’è vegnida dumandada dal Chantun e permessa da la Confederaziun, serva a remplazzar ils trais lufs-tscherver ch’èn vegnids sajettads per sbagl l’atun 2024. «Uschia duai la populaziun dals lufs-tscherver en la regiun pertutgada vegnir messa en il stadi oriund», scriva la Regenza en sia resposta. Per la Regenza saja quest proceder correct ed adequat, betg sco ultim en vista al fatg che la regulaziun dal luf, che vegn anc adina giuditgada da differentas varts cun in egl critic, na dastga betg perder sia acceptanza pervia da questas schluppettadas falladas. Ultra da quai na saja betg da far quint che la colonisaziun dals animals chaschunia dischavantatgs per l’agricultura.
Refusar l’incumbensa
Per quest motiv insista la Regenza sin la colonisaziun da dus lufs-tscherver ch’è vegnida dumandada dal Chantun e permessa da la Confederaziun. La mesira saja da chapir sco cumpensaziun intenziunada. «La finamira n’è betg quella d’engrondir la populaziun u d’augmentar ils conflicts, mabain da restabilir il stadi oriund en la regiun pertutgada e da cuntanscher a medem temp ina meglieraziun genetica da la populaziun regiunala da lufs-tscherver», scriva la Regenza. Sin basa da questas explicaziuns propona la Regenza al Cussegl grond da refusar l’incumbensa.
Gust da leger dapli?