Recuors pertuccont votaziun vegn tractaus cun prioritad

Dumengia, ils 8 da mars 2026 ha la vischnaunca da Mustér votau davart il project per in parc da giugs, divertiment ed acrobatica. A quel ha ella detg gie. Encunter la votaziun ei vegniu inoltrau in recuors dil dretg da vuschar tier la Dertgira superiura dil cantun Grischun. Sco quei che la dertgira ha rispundiu sin damonda dalla FMR, ei il recuors pertuccont il «Parc da giugs e moviment cun center d’acrobatica sigl areal dil Center Fontauna» pendents. Silla damonda, cura ch’ei seigi da quintar cun ina decisiun dalla dertgira scriva quella: «Recuors dil dretg da vuschar vegnan tractai cun prioritad dalla Dertgira superiura. Il mument succeda la correspondenza. Schispert che quella ei terminada vegn la dertgira ad elavurar ina decisiun. Pertuccont in termin sa vegnir fatg negina prognosa.»