Posta

La scaffa da brevs s’empleina. Duront svidar ella patratgel jeu vid mia veglia patria Danemarc che ha gest mess giu la posta. Igl emprem eis ella vegnida privatisada, lu menada alla malura ed ussa, cu las elecziuns stattan avon porta, duei ina nova firma semussar habla da reparter plirs milliuns cuviartas cun il material da votar. Tgei drama penibel.

Jeu arvel l’emprema brev, in miez pac da pupials che pretendan da mei da saver, tgei che fuss da scriver ella Constituziun davart la muneida svizra. Da saver, sch’ils daners els fonds da clima tonschien ni buc. Sch’ils cantuns damognan da mirar atras aunc dapli declaronzas da taglia ni buc. Sche nus veglien splimar il radio e la televisiun romontscha.

Jeu scrivel ina brev agl uffeci da taglia e fetschel amogna da buc inoltrar ni pagar ils proxims onns – per levgiar ad els la lavur. Ulteriuramein scrivel ina brev alla Banca naziunala e fetschel amogna da mirar da lur muneida, sch’els capeschien suenter la votaziun buca tgei ch’els hagien da far.

Daferton vegn in’autra brev, aunc pli grossa. La banca seigi giuridicamein obligada da controllar sias datas, jeu duegi far aschi bien ed emplenir ora il formular da siat paginas. Jeu scrivel ad els che jeu hagi gest fatg quei avon in pèr meins e sch’els hagien vinavon problems cun lur datas, duegien els contactar il Mossad, il survetsch secret israelian, lez hagi segir copias.

Lu arriva ina brev dil Departament per malproporziunalitad ed augment da birocrazia che jeu dueigi far aschi bien e far in test da tudestg. Jeu scrivel anavos che jeu seigi gest occupada cun midar la Constituziun federala e cun emplenir ora formulars per lur collegas tier la banca e ch’els dueigien prender si contact cun il Mossad – leu hagi ei segir copias auditivas da mei, co jeu tschontschel tudestg.

Il Depp-artament dat denton buca luc e scriva anavos che jeu stoppi era saver scriver tudestg. Jeu scrivel anavos ch’els dueigien scriver a mi per romontsch, damai che jeu hagi gest legiu da quei dretg ella Constituziun, e sch’els calien buc, prendi jeu sezza si contact cun il Mossad per dumandar, tgei datas ch’ei hagien tut dad els.

Cuort suenter, senza che jeu hai giu peda da scriver, dat il Mossad risposta. Direct sin miu handy. Ch’els seigien gest ualti occupai cun midar la constituziun egl Iran e sche jeu hagi vinavon problems cun tut quellas brevs, sappi jeu deponer miu handy giun scaffa da brevs, lu seigi quei problem sligiaus en in pampf. Jeu stoppi mo semtgar il stizzader da fiug.

Ah, con bia pli interessant che la veta ei, cu ins survegn posta. Jeu scrivel ina brev a mes amitgs a Danemarc davart tut mias experientschas, fetschel ina foti e laschel ir ei digital.

Anna-Luisa Joël è creschida si a ­Danemarc e viva dapi onns en la ­Rumantschia. Il text è inspirà mo ­levamain d’experientschas actualas cun la birocrazia svizra.