Rolf Grieder es il nouv president

Avant 63 ons es gnüda fundada la secziun regiunala dal Touring Club Svizra Engiadina Bassa/Val Müstair (TCS EB/VM). La secziun dal Grischun festagia quist on seis 100avel anniversari. Ils commembers e las commembras da la secziun regiunala sun gnüts invidats a la radunanza generala cun indicaziun da las tractandas. Ouravant sun ils raduond 40 commembers gnüts invidats ad üna tschaina avant cha’l president scadent, Armon Parolini ha lura salüdà ils preschaints in venderdi passà in l’Hotel Bellaval a Scuol. Davo la prelecziun dal protocol da l’on passà ha gnü lö il rapport annual dal president: «Che vaina passantà l’on passà?»

Program dal 2025 e nouv president

«Nus vain pudü introdüer l’installaziun dal TCS bike repAIR cul motto ‹per cha tü rivast adüna inavant›», ha quintà Armon Parolini dal program dal 2025. I’s tratta d’üna pütta per reparaturas da velos in S-charl pro’l Restorant Major cun landervia diversas üsaglias per cumadar ils velos, chargiar la battarias e pumpar las roudas. In gün es stat ün arrandschamaint a Scuol in connex cun 100 ons auto liber in Grischun. L’excursiun es statta quist on a Romanshorn pro l’Autobau Erlebniswelt. Ella es statta organisada da Rolf Grieder. Ün oter arrandschamaint es stat la visità dal «Zauberwald Lenzerheide». La chaschiera Jolanda Andri-Kirchen ha preschantà il quint annual 2025 chi serra cun 7363 francs entradas e cun 13 287 francs sortidas e cun ün s-chavd da 5924 francs. Davo il rapport dals revisurs ha la radunanza dat dis-charg cun grond applaus. Cun quai cha Armon Parolini da Scuol ha demischiunà davo ch’el ha presidià la gruppa regiunala dal TCS ­­EB/VM dürant 15 ons, ha la radunanza elet a Rolf Grieder, eir da Scuol, chi’d es stat divers ons assessur in suprastanza cun applaus. Oramai cha ingün nun ha vuglü surtour la plazza vacanta sco assessur, ha Armon Parolini surtut quella carica per almain ün on.

Referat da Mathias Filli 

Davo la part uffiziala ha Mathias Filli quintà d’ün viadi in Afganistan cun trais camiuns vegls da militar 2DM (1943 – 1946). «Nus vain manà ün convoi cun trais schofförs ed ün cumpogn in incumbenza da l’organisaziun ‹Ostschweizer Hilfe für Afghanistan› cun 10 tonnas material da salvamaint ed instrumaints per operaziuns, cuvertas da lana, lets ed oter plü.» El ha rapportà chi saja i bod ün on fin ch’els han gnü organisà tuot. Ün di hajan els lura chargià tuot, plombà tuot e sajan rivats pro la duana. «Là vaina stuvü s-chargiar tuot e chargiar da nouv e nu vain listess na pudü ir sur cunfin. Davo eschna its pro la duana ad Au e quels han laschà passar sainza cumplicaziuns.» Tras nouv pajais ha il convoi fat 6260 kilometers in 26 dis. Cun ün film cuort e cun diversas fotografias ha il referent dat üna buna survista d’ün viadi spectacular.