Territori da skis serrà per immediat

La stagiun da skis i’l territori Minschuns illa Val Müstair es a fin per immediat. Sco quai cha’l mainagestiun Daniel Pitsch ha dit invers la FMR sforza ün problem tecnic vi d’ün runal da stuvair serrar il territori da skis amo plü bod co planisà. Causa las relaziuns actualas cun paca naiv e pacas frequenzas d’eira nempe be l’eivna passada gnü decis da serrar las portas da la regiun da skis fingià ils 15 da marz ed uschenas ün’eivna plü bod co planisà. Cha’l runal as vessa insè pudü metter in funcziun infra trais dis darcheu, cha però in vista a la serrada plü adura da quista dumengia e causa las pacas frequenzas, as haja lura decis da glivrar la stagiun güsta per immediat.

On da giubileum sainza far festa

Causa mancanza da naiv dürant l’inviern es la gronda part dal territori da skis statta serrada per plüssas eivnas quista stagiun e quai güsta dürant l’on da giubileum da 50 ons territori da skis Minschuns. Eir las festivitats pel giubileum s’haja, causa ün mortori i’l decuors da la stagiun, decis da spostar perquai.

Uschea guarda il territori da skis inavo sün üna stagiun d’inviern 2025/26 pac allegraivla, eir quai chi pertocca las cifras. Chi s’haja gnü bainschi blerun damain frequenzas ed entradas dürant quista stagiun – raduond la mità uschè bleras co oters ons – però suot il strich eir damain cuosts. Per trar qualche conclusiuns e far ün bilantsch final da quista stagiun esa tenor Daniel Pitsch uossa però amo massa bod.